shaayed vafa key khail sey uktaa gayaa thaa vo

aaNkhoN kaa rang, baat kaa lehjaa badal gaya
vo shaKhs ek shaam meN kitna badal gaya !

kuch din to mera aks raha aaiiney pey naqsh
phir yuN hu’aa keh Khud mera chehra badal gaya

jab apney apney haal pey ham tum na rah sakey
to kyaa hu’a jo ham sey zamaana badal gaya

qadmoN talsy jo rait bichii thi vo chal paRii
us ney chhuRaaya haath to sehraa badal gaya

ko’ii bhi chiiz apni jagah par nahiiN rahi
jaatey hi ek shaKhs kay, kaya kya badal gaya !

ek sar-khushii kii mauj ney kaisa kiya kamaal
vo be-niyaaz, saarey kaa saaraa badal gaya

uThTh kar chalaa gaya ko’ii vaqfey key darmiyaaN
pardaa uTha to saara tamaasha badal gaya

hairat sey saarey lafz usey dekhtey rahey

                                    baatoN meN apni baat ko kaisa badal gayaa

kahney ko ek seh’n meN diivaar hii bani
ghar ki fizaa, makaaN kaa naqshaa badal gaya

shaayed vafa key khail sey uktaa gayaa thaa vo
manzil key paas aa key jo rastaa badal gayaa

qaayem kisii bhii haal pey duniyaa nahiiN rahii
taa’biir kho gayii, kabhii sapnaa badal gayaa

manzar kaa rang asl meN saayaa tha rang kaa
jis ney usey jidhar sey bhii dekhaa badal gaya

andar kay mausomoN kii Khabar us kii ho gayii
us nau-bahaar-e-naaz kaa chehraa badal gaya

aaNkhoN meN jitney ashk they jugnuu sey ban gaye
vo muskuraaya aur merii duniyaa badal gayaa

apnii galii meN apnaa hii ghar dhhuNdhtey haiN log
“Amjad” ye kaun sheh’r ka naqshaa badal gayaa