Vahee Andaaz Hay Zaalim Kaa Zamaaney waalaa

Dost Ban Kar Bhii Nahiin Saath Nibhaney Wala

Vahee Andaaz Hay Zaalim Kaa Zamaaney waalaa

Ab usay Log Samajhatey Hain Giraftaar Meraa

Sakht Nadiim Hay Mujhay Daam Main Laaney vaalaa

Kia Kahain Kitaney Maraasim They Hamaarey us Sey

Wo Jo Ik Shakhs Hay Munh Pher K Jaanay waalaa

Terey Hotey Huay Aa Jaatii Thee Saari Duniya

Aaj Tanhaa Hoon To Koi Naheen Aany waala

Muntazir Kis Ka Hoon Tooti Hui Dahalez Pey Main

Kaun Aayega Yahaan Kaun Hay Aany waala

Main Ne Dekhaa Hay Bahaaron Main Chaman Ko Jalatey

Hay Koi Khvaab Ki Taabeer Bataany waala

Kyaa Khabar Thee Jo Meri Jaan Main Ghulaa Hay Itanaa

Hai wahee Mujh Ko Sar-E-Daar Bhee Laanay Wala

Tum Takalluf Ko Bhii Ikhlaas Samajhtay  Ho ‘Faraz’

Dost Hotaa Nahiin Har Haath Milaaney waalaa