Baaiis e Tarq e Mulaqaat Bataatay Bhi Nahin

Uzar Aanay Mein Bhi Hai Aur Bulaatay Bhi Nahin,
Baaiis e Tarq e Mulaqaat Bataatay Bhi Nahin .

Kya Kaha Phir To Kaho, Hum Nahin Suntay Teri ?
Nahin Suntay To Hum Aison Ko Bataatay Bhi Nahin.

Khoob Pardaa Hai Keh Chilman Se Lagay Baithay Hain,
Saaf CHuptay Bhi Nahin, Saamnay Aatay Bhi Nahin.

Ho CHuka Tarq e Ta'alluq To Jaffayain Kyun Hon,
Jin Ko Matlab Nahin Rehta Wo Sataatay Bhi Nahin.

Zeest Se Tang Ho Ay Daagh To Jeetay Kyun Ho ?
Jaan Pyaari Bhi Nahin, Jaan Se Jaatay Bhi Nahin .. !!