بکھر جانے سے پہلے ہی سنبھل کر دیکھ لیتے ہیں

بکھر جانے سے پہلے ہی سنبھل کر دیکھ لیتے ہیں
چلو ہم بھی ہوا کی سمت چل کر دیکھ لیتے ہیں

کسے معلوم اقرارِ محبت رنگ بدلے گا
ابھی دل کو تیرے دل سے بدل کر دیکھ لیتے ہیں

جہاں میں منتظر ہیں اور بھی غم ذات سے بڑھ کر
حصارِ ذات سے باہر نکل کر دیکھ لیتے ہیں

چھلک جاتے ہیں اب غم بھی تمنا بن کے آنکھوں سے
کہ اس دریا کو بھی اندر نگل کر دیکھ لیتے ہیں

ہوائے دشت سے کہنا ہماری سمت آ جائے
فراقِ ذات میں دونوں ہی جل کر دیکھ لیتے ہیں

تمہیں سوچیں تمہیں دیکھیں تمہیں چاہیں تمہیں مانگیں
تمہیں پانے کی خواہش میں مچل کر دیکھ لیتے ہیں

اگر جلنے کی خواہش ہے تو پروانے بنو تم بھی
مثال شمع پھر ہم بھی پگھل کر دیکھ لیتے ہیں

مزا کچھ اور ملتا ہے تبسم اِن شراروں میں
چلو اک بار ساون میں نکل کر دیکھ لیتے ہیں