Ashk aankhon men chupaatey huey thak jata hun

Ashk aankhon men chupaatey huey thak jata hun,

Bojh paani ka uthatey huey thak jata hun,


Paaon rakhtey hain jo mujh par unhen ehsas nhi,

Main nishanaat mitaatey huey thak jata hun,


Barf aisi keh pighalti nhi paani ban kar,

Piyaas aisi keh bujhatey huey thak jata hun,


Achi lagti nhi is darja shanaasai bhi,

Haath, haathon sey milatey huey thak jata hun,


Gham Gusaari bhi ajab kaar-e-muhabbat hai keh main,

Roney walon ko hansaatey huey thak jata hun,


Itni Qabrain na banaao merey andar Mohsin,

Main chiraghon ko jalatay huey thak jata hun.