Tujh Ko Maloom Nahi Royi Huwi Aankh Ka Gham

Jitna Aaya Hai Terey Baad Nazar Baarish Men
Itna Sunsaan Na Tha Pehlay Nagar Baarish Men


Dhul Gaya Lamhon Men Saalon Ka Parra Gard-o-Ghubaar
Ho Gaye Aur Bhee Sar-Sabz Shajar Baarish Men


Tujh Ko Maloom Nahi Royi Huwi Aankh Ka Gham
Kar K Dekho Tou Kisi Shaam Safar Baarish Men


Kam Tou Pehlay Bhi Nahi Tha Magar Ay Bichray Huway
Barh Gaya Aur Terey Gham Ka Asar Baarish Men


Har Taraf Ek Udaasi Si Utar Aati Hai
Kisi Zindaan Men Dhal Jaata Hai Ghar Baarish Men


Ay Alamnaak Ghataao Usey Jaa Kar Kehna
Takta Rehta Hai Koi Jaanib-e-Dar Baarish Men


Is Qadar Rasmi Hai Wo Shakhs Keh Bas Holay Sey
Pooch Leta Hai Janaab Aaj Kidher Baarish Men ?