مرگ وفا

اگرچہ مرگ وفا ایک سانحہ تھا مگر

اگرچہ خوف کے عالم میں خواب ختم ہوا
لگا کہ روح پہ طاری عذاب ختم ہوا

یہ ملنا اور بچھڑنا ہے پانیوں کی طرح
کہ ایک لہر اٹھی نقش آب ختم ہوا

کسی کو پڑھ لیا ایک ہی نشست میں ہم نے
کوئی ضخیم تھا اور باب باب ختم ہوا

اگرچہ مرگ وفا ایک سانحہ تھا مگر
میں خوش ھوا کہ چلو یہ سراب ختم ہوا

مہک کے ساتھ ہی رنگت بھی اڑ گئی"خالد"
بچھڑ کے شاخ سے خود بھی گلاب ختم ہوا

میرے ھاتھوں کی لکیروں میں

آنکھ کس لفظ پہ بھر آئی ھے

کون سی بات پہ دل ٹوٹا ھے

میرے ھاتھوں کی لکیروں میں کوئی

زندگی بن کے چھپا بیٹھا ھے

مردہ دل ھم بھی نہ تھے پر اب کے

حادثہ ھم پہ عجب گزرا ھے

اب سے پہلے کئی صدیاں پہلے

جیسے خود کو بھی کہیں دیکھا ھے

آسماں جھانک رھا ھے"خالد"

چاند کمرے میں میرے اترا ھے

کسی کو دیکھوں تو ماتھے پہ ماہ و سال ملیں

کسی کو دیکھوں تو ماتھے پہ ماہ و سال ملیں

کہیں بکھرتی ہُوئی دھول میں سوال ملیں

ذرا سی دیر دسمبر کی دھوپ میں بیٹھیں

یہ فرصتیں ہمیں شاید نہ اگلے سال ملیں

یہ شعر و شاعری سب ہے عطا ان آنکھوں کی

وہ اک نگاہ اُٹھائے تو سو خیال مِلیں

جو اپنے چہرے کو محفوظ دیکھنا چاہے

وہ کیا کرے کہ یہاں آئینوں میں بال ملیں

میں بے ہنر تھا سو حیرت میں گم ہُوا خالد

کہ ہر قدم پہ یہاں لوگ با کمال ملیں

اُسے تو کھو ہی چکے پھر خیال کیا اُس کا

اُسے تو کھو ہی چکے پھر خیال کیا اُس کا

یہ فکر کیسی کہ اب ہو گا حال کیا اُس کا

وہ ایک شخص جسے خود ہی چھوڑ بیٹھے تھے

گُھلائے دیتا ہے دل کو ملال کیا اُس کا

تمھاری آنکھوں میں چھلکیں ندامتیں کیسے 

جواب بننے لگا تھا سوال کیا اُس کا

تمھارے اپنے ارادے میں کوئی جھول نہ تھا

کہو کہ ملنا تھا ایسا محال کیا اُس کا

وہ نفرتوں کے بھنور میں بھی مُسکرا کے ملا

اب اس سے بڑھ کے بھلا ہو کمال کیا اُس کا

اب اس طرح بھی نہ یادوں کی کرچیاں چُنیے

نہ تھا فراق سے بہتر وصال کیا اُس کا

یہ سوچ کر نہ ملے پھر اُسے کبھی خالد

کہ جانے ہو گا ندامت سے حال کیا اُس کا