اب تُو بھی لئے پھرتا ہے اک داغِ جدائی

اک عمر سے میں بات یہی سوچ رہا ہوں
تم چھوڑ نہ دو ساتھ یہی سوچ رہا ہوں

ٹوٹا ہے مرے دل کی طرح تیرا فسوں بھی
اے شہرِ طلسمات! یہی سوچ رہا ہوں

کب روح میں اُترے گا تری روح کا پَرتَو
کب ہو گی ملاقات یہی سوچ رہا ہوں

اب تُو بھی لئے پھرتا ہے اک داغِ جدائی

 

اک جیسے ہیں حالات یہی سوچ رہا ہوں
دن سارا گزارا ہے بقا کوئے بتاں میں
گزرے گی کہاں رات یہی سوچ رہا ہوں

تُو میری خوشیوں سے بے خبر ہے

حریمِ جاں میں بھٹک رہا ہوں
میں قافلے سے بچھڑ گیا ہوں

دُھواں ہوں جلتے ہوئے مکاں کا
فضا میں تحلیل ہو رہا ہوں

تُو میری خوشیوں سے بے خبر ہے
میں تیرے دُکھ سے بھی آشنا ہوں

سماعتیں جن کی مر چکی ہیں
میں اُن کو آواز دے رہا ہوں

وہ مجھ کو تقسیم کر رہا ہے
میں جس کے غم سے جُڑا ہوا ہوں

نہ کوئی رستہ نہ کوئی منزل
عجیب راہوں پہ چل رہا ہوں

بقا کوئی تو مجھے سمیٹے
میں اک اکائی تھا ‘ بٹ گیا ہوں

جب سے وہ آیا ہے میرے دھیان میں

جب سے وہ آیا ہے میرے دھیان میں
ذہن و دل ہیں عالمِ وجدان میں
خود بخود خوابوں کے در کھلنے لگے
کون آیا ہے مرے امکان میں
ہم نے تیرا ذکر چھیڑا اور پھر
روشنی سی ہو گئی دالان میں
وہ گیا تو روح کو بھی لے گیا
بات کیا تھی دل کے اس مہمان میں
حسن پردے سے نکل کر اور بھی
ڈال دیتا ہے خلل ایمان میں
جب کیا گھاٹے کا ہی سودا کیا
عمر بھر ہم تو رہے نقصان میں
چند سپنے ہیں مرے ساتھی بقا
اور کیا رکھا ہے اب سامان میں

رنگ ‘ رنگوں میں ملاتے کیوں ہو؟

لعل مٹی میں ملاتے کیوں ہو؟
ہمنشیں! اشک بہاتے کیوں ہو؟
ہاں اگر پیار ہے مجھ سے تو کہو!
تم مجھے اتنا رُلاتے کیوں ہو؟
گر مٹانا ہی ضروری ٹھہرا
رائیگاں نقش بناتے کیوں ہو؟
جانِ جاں! اپنے حسیں خوابوں کی
راکھ دریا میں بہاتے کیوں ہو؟
کون آیا ہے ‘ کِسے آنا ہے
دیپ صحرا میں جلاتے کیوں ہو؟
کیا نیا رنگ بنانا ہے تمہیں
رنگ ‘ رنگوں میں ملاتے کیوں ہو؟

کیا کروں بس گیا اک شخص انوکھا مجھ میں

اب نہیں درد چھپانے کا قرینہ مجھ میں
کیا کروں بس گیا اک شخص انوکھا مجھ میں

اس کی آنکھیں مجھے محصور کئے رکھتی ہیں
وہ جو اک شخص ہے مدت سے صف آرا مجھ میں

اپنی مٹی سے رہی ایسی رفاقت مجھ کو
پھیلتا جاتا ہے اک ریت کا صحرا مجھ میں

میرے چہرے پہ اگر کرب کے آثار نہیں
یہ نہ سمجھو کہ نہیں کوئی تمنا مجھ میں

میں کنارے پہ کھڑا ہوں تو کوئی بات نہیں
بہتا رہتا ہے تیری یاد کا دریا مجھ میں

ڈوب تو جاوں تری مد بھری آنکھوں میں مگر
لڑکھڑانے کا نہں حوصلہ اتنا مجھ میں

جب سے اک شخص نے دیکھا ہے محبت سے بقا
پھیلتا جاتا ہے ہر روز اجالا مجھ میں