ابھی سے

مجھے بے رنگ رہنے دو

تمہارے روپ سے بڑھ کر کہیں جمال نہیں

تمہارے روپ سے بڑھ کر کہیں جمال نہیں
کسی کے لفظ ہیں، میری تو کچھ مجال نہیں

کسی کی باتوں میں آکر اسے گنوانا مت
یہ دل تو گوہر نایاب، یہ سفال نہیں

فلک ہے ان کا ٹھکانہ وہاں چمکتے ہیں
ٹھہر گئے ہیں جو پلکوں پہ تو کمال نہیں؟

کہاں تمہاری نظر میں میرا مقام بھلا
مگر یوں دل سے تو اپنے مجھے نکال نہیں

کہا، یہ تھام لی دیوار تو یونہی ورنہ
نہیں، بچھڑنے کا مجھ کو ذرا ملال نہیں

زمیں سے کرچیاں کیوں چن رہی ہے آج بتول
نہیں کہا تھا تجھے دل کو سنھبال، نہیں؟

ابھی محبت نئی نئی ھے

ابھی تو ملنے کی ُجستجو ھے
ابھی تو مبہم سی گُفتگو ھے
ابھی ھے شکوے شکائتوں کا حساب باقی
محبتوں کا ابھی ھے سارا نصاب باقی
ابھی تعاقب میں رتجگے ھیں
ابھی تو خوابوں کے سلسلے ھیں
بہت سے دُشوار مرحلے ھیں
ابھی تو آنکھوں میں زندگی ھے
ابھی تو چہرے پہ تازگی ھے
ابھی محبت نئی نئی ھے۔۔۔۔۔۔۔

چلو چاہت کو قسمت کر کے دیکھیں

جدا دل سے محبت کر کے دیکھیں
جہاں کو محو حیرت کر کے دیکھیں

بہانے سے چلو ہم طور جا کر
ذرا ان کی زیارت کر کے دیکھیں

دعا پھر مانگ لیں گے آؤ پہلے
کسی پتھر کو مورت کر کے دیکھیں

سبب اس کا وہ پوچھیں گے یقینا
بپا پھر سے قیامت کر کے دیکھیں

سنا ہے اس میں راحت ہے غضب کی
چلو چاہت کو قسمت کر کے دیکھیں

ہوئی حد تو بگڑ جائیں گے۔۔ مانا
گلہ کرنے کی جرات کر کے دیکھیں

صلے کو چھوڑ دیں اپنے خدا پر
وفا کو اپنی عادت کر کے دیکھیں

پیار ۔ ۔ ۔ اور وہ بھی ہم کریں تم سے؟

پیار ۔ ۔ ۔ اور وہ بھی ہم کریں تم سے؟
ہـــم کو پیاری ہے زِندگــــی صاحب

اِس میں کچھ آپ کا بھی حصّہ ہے
یہ جو پلکوں پہ ہے نمی صاحب

آج کل ہو کِسی کے چکر میں
بات لوگوں سے یہ سُنی صاحب

آپ ہیں باوفا ، تو یونہی سہی
آپ کی بات مان لی صاحب

بات کیا ہے جو کھائے جاتی ہے
تم نے پوچھی، نہ کچھ کہی صاحب

تلاش کرتے ہوئے دُور مت نِکل جانا

تلاش کرتے ہوئے دُور مت نِکل جانا
یونہی بھٹکتے ہوئے دُور مت نِکل جانا

قیاس ہے وہ سرِ راہ تم کو مل جائے
یہ آس رکھتے ہوئے دُور مت نِکل جانا

پلٹ کے آنے کا پھر اختیار ڈھونڈو گے
سمَے کے ڈھلتے ہوئے دُور مت نِکل جانا

چراغ بجھتے ہوئے دیر کتنی لگتی ہے
چراغ جلتے ہوئے دُور مت نِکل جانا

محبتوں کا تو تِریاق ہی نہیں ممکن
یہ زہر چکھتے ہوئے دُور مت نِکل جانا

وصال، خواب ہے تم اس کو خواب رہنے دو
یہ خواب تکتے ہوئے دُور مت نِکل جانا

وفا کی رُت کو ملا ہے کبھی ثبات کہیں؟
یہ رُت بدلتے ہوئے دُور مت نِکل جانا

یہاں سے آگے تو خاروں کے سلسلے ہیں بتول
گلاب چُنتے ہوئے دُور مت نِکل جانا

دعائیں ہوتی ہیں مغموم، بے ثمر ہو کر

ملی نجات قفس سے تو بے نگر ہو کر
سزا میں ہوگئی تخفیف در بدر ہو کر

ہوا وہ راندہء درگاہ، کر کے ایک خطا
قصُور ہم سے بھی لاکھوں ہوئے بشر ہو کر

اِسی لیے نہیں مانگا اُسے خدا سے کبھی
دعائیں ہوتی ہیں مغموم، بے ثمر ہو کر

تو یوں ہوا کہ دھواں بن کے رہ گئیں آنکھیں
ملا ہے جب سے وہ اِک شخص، خواب گر ہو کر

بجھا بجھا اُسے پایا تو کچھ ہوئی تسکیں
کہ خوش تو وہ بھی نہیں ہم سے بے خبر ہو کر

وہ مسکرا کے ملا جب تو مٹ گئے شکوے
کہ شام ، شام کہاں رہتی ہے، سحر ہو کر

یہ کہکشاں ترے قدموں میں آ بچھے گی بتول
کسی کا رہنا پڑے گا تجھے مگر، ہو کر

محبتوں میں سنا ہے وہ شب نہیں آتی

خوشی کی رت کو پکارو تو کب نہیں آتی
اداسیوں کی گھڑی بےسبٌب نہیں آتی

وہ جس میں چاند ،ستارے کلام کرتے ہیں
محبتوں میں سنا ہے وہ شب نہیں آتی

قدم قدم پہ وفا توڑتی ہے دَم لیکن
جفا سنا ہے کبھی جاں بہ لب نہیں آتی

وہ لوٹ آئے گا جاکر یہ مانتے ہیں مگر
بدن سے روح نکل جائے جب، نہیں آتی

ہوں بند آنکھیں تو صورت تمہاری آتی ہے
اٹھا کے دیکھوں جو پلکیں تو تب، نہیں آتی

بتول ! کوئی دعا مستجاب ہو کیسے
صدائے کن فیکوں بھی تو اب نہیں آتی

صبحیں نہیں رہی ہیں وہ راتیں نہیں رہیں

صبحیں نہیں رہی ہیں وہ راتیں نہیں رہیں 
اب خواب کیسے دیکھوں کہ آنکھیں نہیں رہیں

میں بھی وہی تھی‘ تُو بھی وہی تھا‘ سمے وہی
لب وَا ہوئے تو جانا‘ وہ باتیں نہیں رہیں

اُمید آخرش کہیں پیچھے ہی رہ گئی
منزل کی سمت جاتی ‘ وہ راہیں نہیں رہیں

سب اعتماد پل میں دَھرے کا دَھرا رہا
جب تیر چل چُکے تو وہ گھاتیں نہیں رہیں

مرنے کی جستجو میں تو جیتے رہے بتول
اب جینا چاہتے ہیں تو سانسیں نہیں رہیں

محبت خاک کر دے گی

کہا تھا ناں ۔۔۔ ؟
محبت خاک کر دے گی
جلا کر راکھ کر دے گی
کہیں بھی تم چلے جاؤ
کسی کے بھی تم بنو اور جس کسی کو چاہے اپناؤ
ہماری یاد سے پیچھا چُھڑانا،
اِس قدر آساں نہیں ‌جاناں!
کہا تھا ناں؟
محبت خاک کر دے گی
جلا کر راکھ کر دے گی

وصل کے روگ بُرے ہوتے ہیں

وصل کے روگ بُرے ہوتے ہیں
ہجر کے سوگ برے ہوتے ہیں

ہار میں دل کا ہاتھ ہے کچھ کچھ
اور کچھ لوگ برے ہوتے ہیں

صحراؤں میں کھو جاؤ گے!
عشق کے جوگ بُرے ہوتے ہیں

بستی بس کر مِٹ جائے گی
دل کے روگ بُرے ہوتے ہیں

سُکھ کے بدلے دُکھ دیتے ہیں
کچھ سنجوگ بُرے ہوتے ہیں

یقین ٹوٹ گیا تو بحال پھر نہ ہوا

یقین ٹوٹ گیا تو بحال پھر نہ ہوا
یہ وہ زوال ہے جس کو کمال پھر نہ ہوا

بس ایک بار کسی رو میں اس کو سوچا تھا
اس آئینے میں دھڑکتا خیال پھر نہ ہوا

تلاشتے ہی رہو گے عبث، ملے گا نہیں
جو اپنی مٹھی سے نکلا وہ سال پھر نہ ہوا

گو ابتدا میں تو ہم بھی بکھر بکھر سے گئے
ہاں اس کے بعد ہمیں بھی ملال پھر نہ ہوا

قدم قدم پہ مسیحا ہزارہا دیکھے
یہ اور بات کہ "عیسٰی مثال" پھر نہ ہوا

جو دل کی مٹی کو چھو کر گلاب کر ڈالے
ہنروروں میں کوئی باکمال پھر نہ ہوا

کسی کی آنکھوں میں ایسا جواب لکھا تھا
بتول ہونٹوں سے کوئی سوال پھر نہ ہوا

وہ جو پلکوں سے گرا پل، نہیں ڈھونڈا کرتے

خاک میں گزرا ہوا کل نہیں ڈھونڈا کرتے
وہ جو پلکوں سے گرا پل، نہیں ڈھونڈا کرتے

پہلے کچھ رنگ لبوں کو بھی دیئے جاتے ہیں
یونہی آنکھوں میں تو کاجل نہیں ڈھونڈا کرتے

بیخودی چال میں شامل بھی تو کر لو پہلے
یوں تھکے پیروں میں پائل نہیں ڈھونڈا کرتے

جس نے کرنا ہو سوال، آپ چلا آتا ہے
لوگ جا جا کے تو سائل نہیں ڈھونڈا کرتے

یہ ہیں خاموش اگر، اس کو غنیمت جانو
یونہی جذبات میں ہلچل نہیں ڈھونڈا کرتے

پیچھے کھائی ہے تو آگے ہے سمندر گہرا
مسئلہ ایسا ہو تو پھر حل نہیں ڈھونڈا کرتے

اِن کھلی آنکھوں سے خوابوں کو تلاشو نہ بتول
پلکیں ہو جائیں جو بوجھل ، نہیں ڈھونڈا کرتے

محبت ذات کے اندر کوئی گُم ذات ہوتی ہے

محبت ذات کے اندر کوئی گُم ذات ہوتی ہے
محبت کے تعاقب میں ہمیشہ گھات ہوتی ہے

محبت میں خوشی سے موت کو ہم اوڑھ لیتے ہیں
ذرا سوچو کہ اس میں کوئی ایسی بات ہوتی ہے

محبت شہد میں لپٹا ہوا اک زہر ہے لیکن
محبت جیت ہوتی ہے، محبت مات ہوتی ہے

محبت خود زمانہ ہو کے بھی ہے موسموں جیسی
کبھی یہ صبح ہوتی ہے کبھی یہ رات ہوتی ہے

محبت ایسی خوشبو ہے، کبھی اک جا نہیں رہتی
کسی سے دور ہوتی ہے کسی کے سات ہوتی ہے

محبت ہے سرابوں سی، کہ جیسے ریت مُٹھی میں
کسی سے ہات کرتی ہے کسی کے ہات ہوتی ہے

محبت جس کو حاصل ہو، مقدر کا سکندر وہ
محبت رب کی جانب سے حسیں سوغات ہوتی ہے

یادوں کی چادر

میں تنہا تو نہیں جاناں
مگر جب بھی پرندوں کو کبھی اُڑتے ہوئے دیکھوں
کبھی تتلی کو پھولوں کے لبوں کو چومتے دیکھوں
ہواؤں پر کبھی بادل کے گورے سے ہیولوں کو 
اچانک جھولتے دیکھوں
میں باہر سے سبھی ناتوں کو اس پل توڑ لیتی ہوں
اور آنکھیں موند لیتی ہوں
اور اپنے سر پہ پل بھر کیلئے جاناں
تری یادوں کی چادر اُوڑھ لیتی ہوں

سارے نقش ہوا نے مٹا دیئے

پُوچھا، تمام خواب کے منظر بُھلا دیئے؟
آیا جواب، قید سے پنچھی اڑا دیئے

پُوچھا، کبھی کبھار کے ملنے سے بھی گئے؟
میں نے کہا، جہان نے پہرے بٹھا دیئے

پُوچھا، زمانے بھر سے رہ و رسم کا سبب؟
میں نے کہا، جناب نے پہرے اٹھا دیئے

پُوچھا، وہ ساحلوں کی کہانی کا کیا بنا؟
بتلایا، سارے نقش ہوا نے مٹا دیئے

جس پل اڑائی راکھ تو پُوچھا، یہ کیا کِیا؟
میں نے بتایا، آپ کے سب خط جلا دیئے

ارمان آسمان کو چھونے کے کیا ہوئے؟
میں نے کہا، زمین کے اندر سلا دیئے

تم سے بچھڑ کے کام یہ کرنا پڑا ہمیں

تم سے بچھڑ کے کام یہ کرنا پڑا ہمیں
پھر آج اپنے آپ سے لڑنا پڑا ہمیں

کچھ مانگنے کے واسطے آیا تھا اک فقیر
کاسے کو آج اشکوں سے بھرنا پڑا ہمیں

پہلے تو اک جہاں کے مقابل میں ڈٹ گئے
آخر میں اپنے سائے سے ڈرنا پڑا ہمیں

چاہت کا حادثہ ہی کہیں سانحہ نہ ہو
بےکار اس خیال میں پڑنا پڑا ہمیں

اک خواب کھوجنے کے لیے بارہا بتول
ان نیند وادیوں سے گزرنا پڑا ہمیں

ہمارے دل سے اپنے دل کو تم کرکے جدا دیکھو

 دراڑیں سی ابھر آئی ہیں دل کا آئینہ دیکھو
خراشیں جو لکھی ہیں روح پر،ان کو ذرا دیکھو

لگے گا حشر برپا ہوگیا سارے زمانے میں
ہمارے دل سے اپنے دل کو تم کرکے جدا دیکھو

ہماری آنکھ کا صحرا بھی دیکھو گے مگر پہلے
.تم آندھی کی ہتھیلی پر کوئی جلتا دیا دیکھو

قبول ہونا نہیں ہونا، خدا پر چھوڑ دیتے ہیں
لبوں کو آنکھ سے چُھو کر، لِکھی اُس پر دعا دیکھو

یہ کیا کہ پھول کا سناٹا ہی تم کو سنائی دے
اگر تم آنکھ رکھتے ہو تو خوشبو کی صدا دیکھو

مخالف ہے ازل سے وصل کی ،اس کا بھروسہ کیا
وچھوڑا ساتھ لاتی ہے ہمیشہ سے انا دیکھو

بتول اس نے تمہیں کیا کہہ دیا ،شرمائے جاتی ہو
کبھی تم آئینہ رکھو، کبھی تم آئینہ دیکھو

لہو لہو سے گلابوں کی داستاں دیکھو
ہوئے ہیں قتل بہاروں میں گلستاں دیکھو

سوئے فلک تو سدا دیکھتے ہی رہتے ہو
کبھی تو پلکوں پہ بکھری یہ کہکشاں دیکھو

کسی نے دل لگی، دل کی لگی کسی نے کہا
کسی کے جذبوں کا ہو بھی گیا زیاں دیکھو

شجر شجر کو کہانی تمھاری بتلا دی
صبا کو سمجھا تھا تم نے ہی راز داں دیکھو

ہماری آنکھوں کی برسات دیکھتے کیا ہو
اتر گئی ہیں لہو میں جو بجلیاں دیکھو

نشاں انہی کے ہیں باقی کتاب ہستی میں
زمانہ کرتا رہا جن کو بے نشان دیکھو

فصیل جسم ہے چھلنی تو سر سلامت ہے
عجیب روح میں چلتی ہیں آندھیاں دیکھو

بتول جس کے لئے زندگی لٹا دی ہے
وہ شخص آج بھی ہم سے ہے بدگماں دیکھو