Mein Yaadon Ki Surat Men Hamesha Zinda Rahun Ga

 

Aur jab mein mar jaaun

To

Mujhay kisi khushk phool ki maanind

Muhabbat ki kisi kitab men qaod kar lena

Jab zindagi men kabhi faraghat paao to

Us kitab kay boseeda auraaq men basi

Us khushbu ko

Apni saanson men utar'tay huye

Mujhay yaad karna

Ya phir mujhay kisi aisi jagah dafan karna

Jahan chaaron taraf pahaarr hon

Jahan raaton ko jugnu'on kay qaafilay

Aur din kay waqt titliyan mehv e raqs hon

Jahan kisi munh'zor pahaarri chashmay ki awaaz

Samaat'on ko khubsurat ehsaas bakhshti ho

Jahan moat ka bud'soorat ehsaas dairay daal kar na betha ho

Agar aisa na kar sako to mujhay kahin ghanay junglon men dafan kar aana

Jahan kisi pairr kay neechay musafir rasta bhool kar aan pohanchen

Aur meri qabr par anjanay haath dua'on kay liye uth'tay rahen

Agar aisa bhi na kar sako to

Mujhay muhabbat ki kisi kahani men dafan kar aana

Jis kay kirdaar mar jaayen lekin muhabbat hamesha zinda rahay

Agar aisa bhi na kar sako to mujhay bas apnay dil men dafan kar lena

Kyun keh tumhara dil duniya ki wahid jagah ho gi

Jahan marnay kay baad bhi mein

Yaadon ki surat men hamesha zinda rahoon ga..

Ishq hamara paisha thehra aashiquee apni zaat huii

Aaj hamari aankhon say phir ashkon ki barsaat huii

Ghir aayee phir say taareeki jeeven men phir raat huii

Hum ko to jis jis nay dekha bola pagal deewana

Ishq hamara paisha thehra aashiquee apni zaat huii

Bikhri teray pyar ki khushbu joon'he hum nay mondi aankhen

Hotay hotay neend hamari yaadon ki baraat huii

Hum say bhi rakhtay ho rishta fikr bhi tum ko auron ki

Chaahat men bhi duniya'daari khud socho kaya baat huii

Sapnay jeetay aankhen haareen dil jeeta aur dharkan haaray

Baazi apnay haath men thi par man'marzi say maat huii

Daal diye darya men ghoray aag laga di kashti ko

Haath men jis kay suraj qismat us kay saath huii

Woh janti thi keh wafa ka ajar nahi hota

Woh janti thi keh wafa ka ajar nahi hota

Muhabbaton main sabar ka samar nahi hota

Woh janti thi

Muhabbat dukhon ka sehra hai

Jahan saraab si khushiyan hain

Aur azaab say gham

Jahan hai pyaas judaii ki be'tahasha magar

Millan ki barishen hoti hain jis dayaar main kam

Wo janti thi

Muhabbat khiraaj mangti hai

Wo jis ko dil ka lahoo day kay jagmagaya ho

Andheri raah kay liye wo cheragh mangti hai

Wo janti thi

Muhabbat wo reh'guzar hai jahan

Bichay hain kanch judaii kay be'shumar magar

Barahna'pa hi inhen paar karna paRta hai

Ghamon ki dhoop main jab sayebaan koi na ho

Kisi yaad ki chaadar ko taan kar khud par

Tammam aahein daba kar guzarna paRta hai

Wo janti thi keh wafa ka ajar nahi hota

Mohabbat main sabar ka samar nahi hota

Hij'r ki raah main hoti hai be'tahasha ghutan

Wahan kabhi bhi hawa ka guzar nahi hota

Wo janti thi phir bhi rog lay bethi

Kisi kay pyaar main na jaanay kyun jog lay bethi