چشمِ تر ، قلبِ حزیں ، آبلے پاؤں میں لئے

اس نے مکتوب میں لکھا ہے کہ مجبور ہیں ہم
اور بانہوں میں کسی اور کی محصور ہیں ہم

اُس نے لکھا ہے کہ ملنے کی کوئی آس نہ رکھ
تیرے خوابوں سے خیالوں سے بہت دور ہیں ہم

ایک ساعت بھی شبِ وصل کی بھولی نہ ہمیں
آج بھی تیری ملن رات پہ مغرور ہیں ہم

چشمِ تر ، قلبِ حزیں ، آبلے پاؤں میں لئے
تیری اُلفت سے ، ترے پیار سے معمور ہیں ہم

اُن کی محفل میں ہمیں اذنِ تکلم نہ ملا
اُن کو اندیشہ رہا سرمد و منصور ہیں ہم

یوں ستاروں نے سنائی ہے کہانی اپنی
گویا افکار سے جذبات سے معذور ہیں ہم

اس نے لکھا ہے جہاں میں کریں شکوہ کس سے
دِل گرفتہ ہیں غم و درد سے بھی چُور ہیں ہم

تیرا بیگانوں سا ہم سے ہے رویہ شہزاد
باوجود اِس کے ترے عشق میں مسحور ہیں ہم

ہر گھڑی ذکر ترا وردِ زباں ہوتا ہے

ہر نئے موڑ پہ منزل کا گماں ہوتا ہے
ظلم وہ بھی ہے جوبےنام ونشاں ہوتا ہے

جھیلتے جاتے ہیں خاموشی سے ہرایک ستم
مسکرا لیتے ہیں جب درد جواں ہوتا ہے

کیسی خاموشی مری، کیسا تغافل میرا
ہر گھڑی ذکر ترا وردِ زباں ہوتا ہے 

ہنس کے کہنے لگے "ذکراسکا بہت سنتے ہیں
کیسا ہوتا ہے یہ دکھ اور کہاں ہوتا ہے ؟ "

تیری آمد ہے نویدِ گل و نغماتِ صبا
تیرے جانے پہ قیامت کا سماں ہوتا ہے

اے پرستان کو جاتے ہوئے لوگو ! یہ کہو
میرے محبوب سا دنیا میں کہاں ہوتا ہے

معتدل لوگ ہی شہزاد بھلے ہوتے ہیں
حد سے بڑھتا ہوا ہر کام زیاں ہوتا ہے