ترےجنگل کی صندل ہوگئی ہوں

ترےجنگل کی صندل ہوگئی ہوں 
سلگنے سے مکمل ہوگئی ہوں

ذرا پیاسے لبوں کی اے اداسی
مجھے تو دیکھ چھاگل ہوگئی ہوں

بدن نے اوڑھ لی ہےشال اس کی
ملائم، نرم، مخمل ہوگئی ہوں

دھنسی جاتی ہے مجھ میں زندگانی
میں اک چشمہ تھی دلدل ہوگئی ہوں

کسی کے عکس میں کھوئی ہوں اتنی
خود آئینے سے اوجھل ہوگئی ہوں

رکھا ہے چاند اونچائی پہ اتنا
تمنائوں سے پاگل ہوگئی ہوں

کرشمہ اک تعلق کا ہے نیناں
کہ میں صحرا سے جل تھل ہوگئی ہوں

آخری خواہش

آخری خواہش

زندہ رہنا سیکھ لیا ہو، سارے دکھوں سے ہار کے جب

کڑی دھوپ میں چلتے چلتے، سایہ،اَگر مل جائے ۔۔۔تو
اک قطرے کو ترستے ترستے، پیاس، اگر بجھ جائے ۔۔۔تو

برسوں سے ،خواہش کے جزیرے ویراں ویراں اُجڑے ہوں
اور سپنوں کے ڈھیر سجا کر، کوئی اگر رکھ جائے ۔۔۔تو

بادل ،شکل بنائیں جب، نیل آکاش پہ رنگوں کے
اُن رنگوں میں اس کا چہرہ، آ کے اگر رُک جائے ۔۔۔۔تو

خاموشی ہی خاموشی ہو، دل کی گہری پاتالوں میں
کچھ نہیں کہتے کہتے گر، کوئی سب کہہ جائے ۔۔۔تو

زندہ رہنا سیکھ لیا ہو، سارے دکھوں سے ہار کے جب
بیتے سپنے ، پا کے خوشی سے ،کوئی اگر ۔۔۔مر جائے ،تو۔۔۔

مین چلی جاؤں گی یادوں کو مقفل کرکے

سرد لمحوں کو مری ذات میں جوڑا نہ کرے

پاس منزل کے پہنچ کر کوئی موڑا نہ کرے 
آدھے رستے میں ہمیشہ مجھے چھوڑا نہ کرے

بھیک کی طرح وہ دیتا ہے رفاقت مجھ کو 
اتنا احسان میری جان پہ تھوڑا نہ کرے

ٹوٹ کر چور اگر ہو گئی جڑنے کی نہیں 
کوئی طعنوں سے انا کو مری پھوڑا نہ کرے

وہ حفاظت نہیں کرتا نہ کرے رہنے دو 
زخم سے میرے مرا درد نچوڑا نہ کرے

برف لمحات میں تنہائی سے ڈر لگتا ہے 
سرد لمحوں کو مری ذات میں جوڑا نہ کرے

چوڑیاں کر نہیں سکتی ہیں تشدد برداشت 
جاتے جاتے وہ کلائی کو مروڑا نہ کرے

میں تیاگ آئی ہوں جس کے لئے سب کو نیناں 
کم سے کم وہ تو مرے مان کو توڑا نہ کرے 

اشکوں کے پانیوں میں اترا کسی کا چہرہ

ان بادلوں میں روشن چہرہ ٹھہر گیا ہے 
میری نظر میں کوئی جلوہ ٹھہر گیا ہے

اشکوں کے پانیوں میں اترا کسی کا چہرہ 
بہتا ہوا اچانک دریا ٹھہر گیا ہے

آنکھوں کی سیپیاں تو خالی پڑی ہوئی ہیں 
پلکوں پہ میری کیسے قطرہ ٹھہر گیا ہے

جس نےمجھے چھوا تھا نشتر تھا وہ ہوا کا 
زخم ایک میرے دل میں گہرا ٹھہر گیا ہے

نیلی رتوں میں کوئی آ کر ملا تھا شاید 
اک زہر سا رگوں میں جس کا ٹھہر گیا ہے

کیسا عجب سفر ہے دل کی مسافتوں کا 
میں چل رہی ہوں لیکن رستہ ٹھہر گیا ہے

گردش رکی ہوئی ہےمیرے لہو کی نیناں 
یا وقت کا کہیں پر پہیہ ٹھہر گیا ہے 

موسم ہے چشمِ تر کا سہانا بنا ہوا

بے روح لڑکیوں کا ٹھکانہ بنا ہوا 
کمرہ ہے میرا آئینہ خانہ بنا ہوا 

میں نےتو کوئی بات کسی سے نہیں کہی 
سوچا ہے جو وہی ہے فسانہ بنا ہوا 

ندیا میں کس نے رکھ دیئے جلتے ہوئے چراغ 
موسم ہے چشمِ تر کا سہانا بنا ہوا 

عورت کا ذہن مرد کی اس کائنات میں 
اب تک ہے الجھنوں کا نشانہ بنا ہوا 

ممکن ہے مار دے مجھے اس کی کوئی خبر 
دشمن ہے جس کا میرا گھرانہ بنا ہوا 

بارش کی آگ ہے مرے اندر لگی ہوئی 
بادل ہے آنسوؤں کا بہانہ بنا ہوا 

نیناں کئی برس سے ہوا کی ہوں ہم نفس 
ہے یہ بدن اُسی کا خزانہ بنا ہوا 

یاد میری بھی پڑی رہتی ہے تکیے کے تلے

صبح کے روپ میں جب دیکھنے جاتی ہوں اسے 
شیشے کی ایک کرن بن کے جگاتی ہوں اسے 

بال کھولے ہوئے پھرتی ہوں کسی خواب کے ساتھ 
شام کو روز ہی روتی ہوں، رلاتی ہوں اسے 

یاد میری بھی پڑی رہتی ہے تکیے کے تلے 
آخری خط کی طرح روز جلاتی ہوں اسے 

راہ میں اس کی بچھا دیتی ہوں ٹوٹی چوڑی 
چبھ کے کانٹے کی طرح روز ستاتی ہوں اسی 

بھولے بسرے کسی لمحے کی مہکتی خوشبو 
گوندھ کر اپنے پراندے میں جھلاتی ہوں اسے 

روز سوچا ہےکہ تم میرےہو، میرے ہو نا

روز دیکھا ہے شفق سے وہ پگھلتا سونا 
روز سوچا ہےکہ تم میرےہو، میرے ہو نا 

میں تو اک کانچ کےدریا میں بہی جاتی ہوں 
کھنکھناتے ہوئے ہمراز مجھے سن لو نا

کان میں میں نےپہن لی ہےتمہاری آواز 
اب مرے واسطےبیکار ہیں چاندی سونا

میری خاموشی کو چپکےسے سجا دو آکر 
اک غزل تم بھی مرے نام کبھی لکھو نا

روح میں گیت اترجاتےہیں جیسےخوشبو 
گنگناتی سی کو ئ شام مجھے بھیجو نا

چاندنی اوس کےقطروں میں سمٹ جائے گی 
تیرگی صبح سویرے میں کہیں کھو دو نا

پھر سےانکھوں میں کوئ رنگ سجا لے نیناں 
کب سےخوابوں کو یہاں بھول گئ تھی بونا