دِکھ رہی ہے جو مُجھے صاف تیری آنکھوں میں

دیکھ لینا کہ کسی دُکھ کی کہانی تو نہیں

یہ جو آنسو ہیں، کہیں اُس کی نشانی تو نہیں

دِکھ رہی ہے جو مُجھے صاف تیری آنکھوں میں

تُو نے یہ بات کہیں مُجھ سے چُھپانی تو نہیں

جانتا ہوں کہ سرابوں میں گِھرا ہوں یارو

دوڑ پڑتا ہوں مگر پِھر بھی کہ پانی تو نہیں

جس طرح شہر سے نکلا ہوں میں بیمار ترا

یہ اُجڑنا ہے، کوئی نقل مکانی تو نہیں

اُس نے چاہا ہے مُجھے اپنے خُدا سے بڑھ کر

میں نے یہ بات زمانے کو بتانی تو نہیں

یہ جو ہر موڑ پہ آ ملتی ہے مُجھ سے فرحتؔ

بدنصیبی بھی کہیں میری دیوانی تو نہیں

ایک پُرہیبت سکوتِ مستقل آنکھوں میں تھا

جِسم تپتے پتھروں پر، رُوح صحراؤں میں تھی
پھر بھی تیری یاد ایسی تھی کہ جو چھاؤں میں تھی

ایک پُرہیبت سکوتِ مستقل آنکھوں میں تھا
ایک طغیانی مسلسل، دل کے دریاؤں میں تھی

ہم ہی ہو گزرے ہیں خود اپنے شہر اجنبی
وہ جہاں بھی تھی وہاں اپنے شناساؤں میں تھی

اِک صدا سی برف بن کر گِر رہی تھی جسم پر
ایک زنجیرِ ہوا تھی، جو میرے پاؤں میں تھی

میں داسی ڈھولن یار کی

میں داسی ڈھولن یار کی 
میری پوری ہوئی مراد

اک آ کے یار کی قید میں 
ہوا تن، من، دھن آزاد

مری لوں لوں کوکے ہجرمیں 
کرے دم دم دل فریاد

کوئی دردمصلّہ ڈال کے 
میری مسجد کرے آباد

تم نہیں ہوتے تو پھر درد زمانے بھر کے

اتنا تو ہوتا نہیں کوئی کھنڈر شام کے بعد
جتنا ویران ہوا جاتا ہے گھر شام کے بعد

ٹوٹ پڑتی ہے نئی روز خبر شام کے بعد
وقت ہوتا ہے عذابوں میں بسر شام کے بعد

میری آنکھوں سے برستے ہوئے دریائوں میں
ڈوب جاتی ہے تری راہ گزر شام کے بعد

تیرے بخشے ہوئے اندوہ کی گھبراہٹ کا
اور ہی رنگ سے ہوتا ہے اثر شام کے بعد

تم نہیں ہوتے تو پھر درد زمانے بھر کے
آن ملتے ہیں مجھے خاک بہ سر شام کے بعد

شاہ ہو کوئی، گدا ہو یا ولی ہو سب کا
فکر کے بوجھ سے جھک جاتا ہے سر شام کے بعد

مل کے اک شہر بھگو دیتے ہیں تنہائی کا
ایک میں ایک مرا دیدئہ تر شام کے بعد

گھیر لیتے ہیں مجھے رستے تری یادوں کے
جب بھی کرتا ہوں ترے بعد سفر شام کے بعد

دن بھی ویراں ہی گزرتا ہے ہمارا لیکن
اور بڑھ جاتا ہے ویرانی کا ڈر شام کے بعد

ہجر کے سائے تو ہر روز ہی آ جاتے ہیں
کیا کبھی ہو گا تمہارا بھی گزر شام کے بعد

ایک بس تم ہی نہیں رات کے گھائل فرحت
خاک اڑتی ہے ہماری بھی ادھر شام کے بعد

ویرانی

درد کی کالی کوٹھڑی میں
عمر قید کے سزا یافتہ
بے قرار اور گھبرائے ہوئے دل کا عالم
اور دل میں قید
شکستہ اور کملائی ہوئی آرزوئیں
اور آرزوؤں میں بند
تھکا ہار اور شکست خوردہ انتظار
اور انتظار کے بعد
دور دور تک خلا اور کھوکھلا پن
خلا اور خاموشی دور دور تک
خاموشی اور ویرانی

سائیاں میرے درد گھٹا، سائیاں میرے زخم بجھا

سائیاں ذات ادھوری ہے، سائیاں بات ادھوری ہے

سائیاں رات ادھوری ہے، سائیاں مات ادھوری ہے

دشمن چوکنا ہے لیکن، سائیاں گھات ادھوری ہے


سائیاں رنج ملال بہت، دیوانے بے حال بہت

قدم قدم پر جال بہت، پیار محبت کال بہت

اور اس عالم میں سائیاں، گزر گئے ہیں سال بہت


سائیاں ہر سو درد بہت، موسم موسم سرد بہت

رستہ رستہ گرد بہت، چہرہ چہرہ زرد بہت

اور ستم ڈھانے کی خاطر، تیرا اک اک فرد بہت


سائیاں تیرے شہر بہت، گلی گلی میں زہر بہت

خوف زدہ ہے دہر بہت، اس پہ تیرا قہر بہت

کالی راتیں اتنی کیوں، ہم کو اک ہی پہر بہت


سائیاں دل مجبور بہت، روح بھی چور و چور بہت

پیشانی بے نور بہت، اور لمحے مغرور بہت

ایسے مشکل عالم میں، تو بھی ہم سے دور بہت


سائیاں راہیں تنگ بہت، دل کم ہیں اور سنگ بہت

پھر بھی تیرے رنگ بہت، خلقت ساری دنگ بہت

سائیاں تم کو آتے ہے، بہلانے کے ڈھنگ بہت


سائیاں میرے تارے گم، رات کے چند سہارے گم

سارے جان سے پیارے گم، آنکھیں گم نظارے گم

ریت میں آنسو ڈوب گئے، راکھ میں ہوئے شرارے گم


سائیاں رشتے ٹوٹ گئے، سائیاں اپنے چھوٹ گئے

سچ گئے اور جھوٹ گئے، تیز مقدر پھوٹ گئے

جانے کیسے ڈاکو تھے، جو لوٹے ہوئوں کو لوٹ گئے


سائیاں تنہا شاموں میں، چنے گئے ہیں باموں میں

چاہت کے الزاموں میں، شامل ہوئے ہے غلاموں میں

اپنی ذات نہ ذاتوں میں، اپنا نام نہ ناموں میں


سائیاں ویرانی کے صدقے، اپنی یزدانی کے صدقے

جبر انسانی کے صدقے، لمبی زندانی کے صدقے

سائیاں میرے اچھے سائیاں، اپنی رحمانی کے صدقے


سائیاں میرے درد گھٹا، سائیاں میرے زخم بجھا

سائیاں میرے عیب مٹا، سائیاں کوئی نوید سنا

اتنے کالے موسم میں، سائیاں اپنا آپ دکھا

یہ دل، یہ اُجڑی ہوئی چشمِ نم، یہ تنہائی

اسی سے ہوتا ہے ظاہر جو حال درد کا ہے
سبھی کو کوئی نہ کوئی وبال درد کا ہے

سحر سِسکتے ہوئے آسمان سے اُتری
تو دل نے جان لیا یہ بھی سال درد کا ہے

اب اس کے بعد کوئی رابطہ نہیں رکھنا
یہ بات طے ہوئی لیکن سوال درد کا ہے

یہ دل، یہ اُجڑی ہوئی چشمِ نم، یہ تنہائی
ہمارے پاس تو جو بھی ہے مال درد کا ہے

یہ جھانک لیتی ہے دل سے جو دوسرے دل میں
میری نگاہ میں سارا کمال درد کا ہے

اسیر ہے میری شاخ نصیب پت جھڑ میں
میرے پرندۂ دل پر بھی جال درد کا ہے

بدل گئے میرے حالات دل تو کیا ہو گا
یہ ایسی بات ہے جس میں زوال درد کا ہے

دلوں پہ زندہ تھا دل ہی نہیں رہے ہیں یہاں
اب ایسے شہر میں جینا محال درد کا ہے

جمود توڑتی آنکھیں، سکوت توڑتے لب
یہ ناک نقشہ یہ سب خدّ و خال درد کا ہے

سُنا ہے تیرے نگر جا بسا ہے بیچارا
سُناؤ کیسا وہاں حال چال درد کا ہے

وگرنہ خار و خزاں کے سوا نہیں کچھ بھی
بس ایک پھول میری ڈال ڈال درد کا ہے

اُکھڑتی جاتی ہے دیوانہ وار ایڑیوں سے
زمینِ جاں پہ ہماری دھمال درد کا ہے

فقیر بیٹھے ہوئے ہیں بہت سکون سے ہم
تیری جدائی کی کُٹیا ہے پیال درد کا ہے

کہ ہم نے کس کے لیے جاں عذاب میں ڈالی
ہمیں تو آج بھی خود سے ملال درد کا ہے

ہمارے سینے میں دل کی جگہ پہ پتھر ہے
اِسی لیے تو یہاں ایسا کال درد کا ہے

تہاری چاہ نے ڈھونڈی تھی میری آبادی
یہ گھاؤ سینے کی بستی میں کھال درد کا ہے

یہ عشق ہے اِسے تیمار داریاں کیسی
اسے نہ پوچھ یہ بوڑھا نڈھال درد کا ہے

ہم اس کو دیکھتے جاتے ہیں، روتے جاتے ہیں
یہ صحنِ شب میں پڑا ہے جو تھال درد کا ہے

نہ تم میں سکھ کی کوئی بات ہے نہ مجھے میں ہے
تمہارا اور میرا ملنا وصال درد کا ہے

ابھی کہیں سے کڑی کوئی بھی نہیں ٹوٹی
ابھی تو سلسلہ سارا بحال درد کا ہے

میری طرف سے گزر کا خیال رہنے دو
یہ راستہ بھی بہت پائمال درد کا ہے

دل و نظر تو رہیں گے سکون میں لیکن
شب فراق مجھے احتمال درد کا ہے

کسی کا درد ہو اپنا سمجھنے لگتے ہیں
ہمارے پاس یہی کچھ مال درد کا ہے

یہیں کہیں میرے اندر کوئی تڑپتا ہے
یہیں کہیں پہ کوئی یرغمال درد کا ہے

اسی لیے تو ہمیں عجز کا قرینہ ہے
ہمارے ذات میں جاہ و جلال درد کا ہے

ہے مار رکھنے کے در پئے تیری مسیحائی
جو دوڑا ہے مَن میں غزال درد کا ہے

وہیں کہیں کسی گھاٹی میں تیرا ہجر بھی ہے
میرے لہُو سے جہاں اِتصال درد کا ہے

نفس نفس پہ پڑے آبلوں سے لگتا ہے
نہ جانے روح میں کب سے اُبال درد کا ہے

یہی تو فرق ہے ان میں اور آپ میں فرحت
کسی کو اپنا کسی کو خیال درد کا ہے

کسی نے پوچھا کہ فرحت بہت حسین ہو تم
تو مُسکرا کے کہا سب جمال درد کا ہے

رات بھی بیت چلی ہے اب تو

صبح سے نکلا ہوا ہے گھر سے
رات بھی بیت چلی ہے اب تو
جانے کس بیتے ہوئے وصل کے کملائے ہوئے در پہ پڑا ہوگا
جانے کس الجھے ہوئے ہجر کے زانو پہ ذرا ٹیک کے سر
چین سے سویا ہوگا
دل ابھی لوٹا نہیں
صبح سے نکلا ہوا ہے گھر
آگیا ہوگا کسی درد کے بہلاوے میں
اور کسی راہ کے ویران کنارے پہ پڑا خواب بلکتا ہوگا
آتے جانتے ہر اِک مسافر کی طرف
ایک سہمی ہوئی امید سے تکتا ہو گا
سوچتا ہوگا جدائی کی کوئی انت نہیں 

ہر چیز میں تمھاری جدائی لگی مجھے

باہر بھی اپنے جیسی خدائی لگی مجھے

ہر چیز میں تمھاری جدائی لگی مجھے

جیون میں آج تیرے لیے رو نہیں سکا

جیون میں آج رات پرائی لگی مجھے

مہندی جچی کچھ ایسے تیرے نرم ہاتھ پر

اک کائنات دست ِحنائی لگی مجھے

پتی، تیری پلک کا کنارا مجھے لگی

شاخ ِگلاب تیری کلائی لگی مجھے

دھڑکن میں تال تیرے خیالوں کی بج اٹھی

سانسوں میں تیری نغمہ سرائی لگی مجھے

حق میں اسی کے فیصلہ ہر شخص نے دیا

ہر شخص تک اسی کی رسائی لگی مجھے

کسی کو سونپی کبھی اپنے وقت کی تقسیم ؟

کہو کسی پہ کبھی درد آشکار کیا؟

کبھی کبھی کئی لوگوں کو سوگوار کیا

کبھی کسی کے لیے خود کو بے قرار کیاَ؟

تمام عمر محبت کا انتظار کیا

کسی کو سونپی کبھی اپنے وقت کی تقسیم ؟

کبھی کبھی تیری یادوں سے کاروبار کیا

یہ شہر بھر میں بھلا کیوں اکڑ کے پھرتے ہو؟

ہمیں غرور بہت ہے کہ ہم نے پیار کیا

کوئی تضاد کوئی اختلاف اس دوراں؟

غموں کو کُند کیا دل کو تیز دھار کیا

کہو جو لوگوں پہ احسان کرتے پھرتے ہو؟

خود اپنے دل کو سدا میں نے زیر بار کیا

بتاؤ دُکھ کی ریاضت میں کیا کیا تم نے ؟

اجل کو پھول کیا، زندگی کو خار کیا

آج پھر تیری یاد مانگی تھی

پھر تیرا ذکر دل سنبھال گیا

ایک ہی پل میں سب ملال گیا

ہو لیے ہم بھی اس طرف جاناں

جس طرف بھی تیرا خیال گیا

آج پھر تیری یاد مانگی تھی

آج پھر وقت ہم کو ٹال گیا

تو دسمبر کی بات کرتا ہے

اور ہمارا تو سارا سال گیا

تیرا ہوتا تو پھٹ گیا ہوتا

میرا دل تھا جو غم کو پال گیا

کون تھا وہ کہاں سے آیا تھا

ہم کو کن چکروں میں ڈال گیا

نقش پختہ تھا تیرے غم کا وگرنہ موسم

مدتوں بعد میرا سوگ منانے آئے

لوگ بھولا ہوا کچھ یاد دلانے آئے

بڑھ گیا دل کے جنازے میں ستاروں کا ہجوم

کتنے غم ایک تیرے غم کے بہانے آئے

رات اک اُجڑی ہوئی سوچ میرے پاس آئی

اور پھر اُجڑے ہوئے کتنے زمانے آئے

ایک اک کر کے حوادث بڑی ترتیب کے ساتھ

مرحلہ وار میرا ساتھ نِبھانے آئے

نقش پختہ تھا تیرے غم کا وگرنہ موسم

بارہا دل سے میرے اس کو مٹانے آئے

سیاہ ہجر گیا, زرد انتظار گئے

سیاہ ہجر گیا, زرد انتظار گئے

کسی کا درد گیا درد کے حصارگئے

اداس رات‘خزاں ہم سفر‘سفر گم نام

ترےخیال کے موسم ہمیں تو مار گئے

نہ جاں بھڑکتی ہے اپنی نہ راکھ ہوتے ہیں

ہمیں یہ کیسی مصیبت میں تم اتار گئے

عجیب دشمنِ جاں تھا کہ بن لڑے جیتا

عجیب جنگ تھی ہم جس میں ہار ہار گئے

بہت ہی تھوڑی سی مہلت ملی محبت کی

ہم اپنا آپ مگر جاتے جاتے وار گئے

کسی کے بھیجے ہوئے آگئے تھے دنیا میں

کسی سے مانگی ہوئی زندگی گزار گئے

نہ چاند اٹکا کسی جا نہ بدلیاں الجھیں

ہم اس کی رات کے آنگن میں بار بار گئے

تمہارا ہجر شدّت سے مرے دل کو مسلتا ھے مجھے تم یاد آتے ھو

تمہارا پیار چھپ چھپ کر کئی چہرے بدلتا ھے مجھے تم یاد آتے ھو

تمہارا ہجر شدّت سے مرے دل کو مسلتا ھے مجھے تم یاد آتے ھو

سمندر آشنا آنکھوں میں صحرا آن بستے ہیں تمہیں جب بھول جاتا ھوں

پھر ان صحراؤں میں ایک خواب کا چشمہ نکلتا ھے مجھے تم یاد آتے ھو

میں اپنے ہاتھ سے تیری سنہری یاد کی پلکیں سجاتا ھوں خیالوں میں

خیالوں میں تیرا موسم کئی پہلو بدلتا ھے مجھے تم یاد آتے ھو

تری پرچھائیاں ہر سو مری تنہائیوں کا رقص کرتی ہیں اداسی پر

میرے سینے میں ایک بےچین سا بچہ مچلتا ھے مجھے تم یاد آتے ھو

کبھی کوئی ستارہ آنکھ سے ہوتا ہوا بجھتا ہےاکے گود میں گر کر

کبھی کوئی بہت ہی دور ابھرتا اور ڈھلتا ہے مجھے تم یاد آتے ہو

کسی فٹ پاتھ پر‘ بازار میں‘ باغات میں یا پھر کسی دریا کنارے پر

بہت خوش ھو کے جب کوئی کسی کے ساتھ چلتا ھے مجھے تم یاد آتے ھو

میں سارادن کوئی سنگی مجسمہ بن کے رہتا ھوں مگر جب شام ڈھلتی ھے

میرے دل کی جگہ پر کوئی پتھر سا پگھلتا ھے مجھے تم یاد آتے ھو

تصور میں تمہارے سنگ بیتی بارشیں اکثر تمہیں آواز دیتی ہیں

نگاہوں میں تمہاری دھوپ کا ایک دیپ جلتا ھے مجھے تم یاد آتے ھو

وہ میرے من میں‌آ بسا کسی ملال کی طرح

نہ رنگ روپ کی طرح نہ خدوخال کی طرح
وہ میرے من میں‌آ بسا کسی ملال کی طرح

وہ میری سب ریاضتوں میں میرے ساتھ ساتھ ھے
کبھی جواب کی طرح کبھی سوال کی طرح 

کبھی کبھی تو کتنا سخت ھے مگر کبھی کبھی
تو کس قدر لطیف ھے میرے خیال کی طرح

تمہارے پیار نے کبھی مجھے رہا نہیں کیا
پڑا ہوا ہے مجھ پہ زندگی کے جال کی طرح

میں راستہ ہوں اور تمہاری یاد قافلہ ھے جو
گزر رہی ھے مجھ سے میرے ماہ و سال کی طرح

ایک بھولی بسری ہوئی یاد

جاناں
میں نے اب کے سال بھی سبز رتوں کا پہلا پھول
اک تیری خاطر شاخِ شجر سے توڑ کے
اپنی زرد کتاب میں لا رکھا ہے
کوئی نہ جانے کبھی کوئی آوارہ بھولا بھٹکا بادل
عمر کے ترسے پیاسے دشت کی

پل میں پیاس بجھا جاتا ہے
کوئی نہ جانے
بعض اوقات ایک بھولی بسری ہوئی یاد بھی 
ایسے پوری ہو جاتی ہے 
جیسے غیر آباد جزیرے 
رستہ بھول کے آنے والے لوگوں سے بس جا تے ہیں

لوٹ آئے نہ کسی روز وہ آوارہ مزاج

میں نے دیکھا دیوانوں کو شام کے بعد

میں نے دیکھا دیوانوں کو شام کے بعد
ڈھونڈھ رہے تھے ویرانوں کو شام کے بعد

تاریکی پھر سارے عیب چھپا لے گی
لے آنا گھر مہمانوں کو شام کے بعد

میں نے اس کا سوگ منایا کچھ ایسا 
خالی رکھا پیمانوں کو شام کے بعد

یاد کرے جب مجھ کو تیری تنہائی
دیکھا کرنا گلدانوں کو شام کے بعد

فرحت چاند کے خوف سے کر لیتا ہوں بند
کمرے کے روشندانوں کو شام کے بعد

شام کے بعد

آنکھ بن جاتی ہے ساون کی گھٹا شام کے بعد 

لوٹ جاتا ہے اگر کوئی خفا شام کے بعد

وہ جو ٹل جاتی رہی سر سے بلا شام کے بعد
کوئی تو تھا کہ جو دیتا تھا دعا شام کے بعد

آہیں بھرتی ہے شب ہجر یتیموں کی طرح
سرد ہو جاتی ہے ہر روز ہوا شام کے بعد

شام تک قید رہا کرتے ہیں دل کے اندر
درد ہو جاتے ہیں سارے ہی رِہا شام کے بعد

لوگ تھک ہار کے سو جاتے ہیں لیکن جاناں
ہم نے خوش ہو کے ترا درد سہا شام کے بعد

شام سے پہلے تلک لاکھ سلائے رکھیں
جاگ اٹھتی ہے محبت کی انا شام کے بعد

خواب ٹکرا کے پلٹ جاتے ہیں بند آنکھوں سے
جانے کس جرم کی کس کو ہے سزا شام کے بعد

چاند جب رو کے ستاروں سے گلے ملتا ہے
اک عجب رنگ کی ہوتی ہے فضا شام کے بعد

ہم نے تنہائی سے پوچھا کہ ملو گی کب تک
اس نے بے چینی سے فوراً ہی کہا شام کے بعد

تم گئے ہو تو سیاہ رنگ کے کپڑے پہنے
پھرتی رہتی ہے مرے گھر میں قضا شام کے بعد

لوٹ آتی ہے مری شب کی عبادت خالی
جانے کس عرش پہ رہتا ہے خدا شام کے بعد

دن عجب مٹھی میں جکڑے ہوئے رکھتا ہے مجھے
مجھ کو اس بات کا احساس ہوا شام کے بعد

کوئی بھولا ہوا غم ہے جو مسلسل مجھ کو
دل کے پاتال سے دیتا ہے صدا شام کے بعد

مار دیتا ہے اجڑ جانے کا دہرا احساس
کاش ہو کوئی کسی سے نہ جدا شام کے بعد

ميرا شام سلونا شاہ پِيا

ميرا شام سلونا شاہ پِيا

کبھی جڑوں میں زہر اتار لِيا

کبھی لبوں کے پیچھے مار لِيا

اس ڈر سے کہ دُکھ کی شدت میں

کہیں نکل نہ جائے آہ پِيا

ميرا شام سلونا شاہ پِيا

ہمیں جنگل جنگل بھٹکا دو

ہمیں سُولی سُولی لٹکا دو

جو جی چاہے سو يار کرو

ہم پڑ جو گئے تيری راہ پِيا

ميرا شام سلونا شاہ پِيا

تيری شکل بصارت آنکھوں کی

تيرا لمس رياضت ہاتھوں کی

تيرا نام لبوں کی عادت ہے

ميری اک اک سانس گواہ پِيا

ميرا شام سالونا شاہ پِيا

کہیں روح میں پياس پُکارے گی

کہیں آنکھ میں آس پُکارے گی

کہیں خون کہیں دل بولے گا

کبھی آنا مقتل گاہ پِيا

ميرا شام سلونا شاہ پِيا

ہمیں مار گئی تيری چاہ پِيا