ہے دعا یاد مگر حرف دعا یاد نہیں

محبت کے مزاروں تک چلیں گے

محبت کے مزاروں تک چلیں گے
ذرا پی لیں! ستاروں تک چلیں گے

سنا ہے یہ بھی رسم عاشقی ہے
ہم اپنے غمگساروں تک چلیں گے

چلو تم بھی! سفر اچھا رہے گا
ذرا اجڑے دیاروں تک چلیں گے

جنوں کی وادیوں سے پھول چن لو
وفا کی یادگاروں تک چلیں گے

حسین زلفوں کے پرچم کھول دیجیے
مہکتے لالہ زاروں تک چلیں گے

چلو ساغر کے نغمے ساتھ لے کر
چھلکتی جوئے باراں تک چلیں گے

حقیقت کو بنا دیتی ہیں افسانے تری آنکھیں

متاع کوثر و زمزم کے پیمانے تری آنکھیں
فرشتوں کو بنا دیتی ہیں دیوانے تری آنکھیں

جہان رنگ و بو الجھا ہوا ہے ان کے ڈوروں میں 
لگی ہیں کاکل تقدیر سلجھانے تری آنکھیں

اشاروں سے دلوں کو چھیڑ کر اقرار کرتی ہیں
اٹھاتی ہیں بہارِ نو کے نذرانے تری آنکھیں

وہ دیوانے زمام لالہ و گل تھام لیتے ہیں
جنہیں منسوب کر دیتی ہیں ویرانے تری آنکھیں

شگوفوں کو شراروں کا مچلتا روپ دیتی ہیں
حقیقت کو بنا دیتی ہیں افسانے تری آنکھیں

اب تو وہ رکھنے محبت کا بھرم آتے ہیں

ایک وعدہ ہے کسی کا جو وفا ہوتا نہیں

ایک وعدہ ہے کسی کا جو وفا ہوتا نہیں 
ورنہ ان تاروں بھری راتوں میں کیا ہوتا نہیں 

جی میں آتا ہے الٹ دیں انکے چہرے کا نقاب 
حوصلہ کرتے ہیں لیکن حوصلہ ہوتا نہیں 

شمع جسکی آبرو پر جان دے دے جھوم کر 
وہ پتنگا جل تو جاتا ہے ، فنا ہوتا نہیں 

اب تو مدت سے رہ و رسم نظارہ بند ہے 
اب تو انکا طور پر بھی سامنا ہوتا نہیں 

ہر شناور کو نہیں ملتا طلاطم سے خراج
ہر سفینے کا محافظ ناخدا ہوتا نہیں 

ہر بھکاری پا نہیں سکتا مقامِ خواجگی 
ہر کس و ناکس کو تیرا غم عطا ہوتا نہیں 

ہائے یہ بیگانگی اپنی نہیں مجھکو خبر
ہائے یہ عالم کہ تُو دل سے جُدا ہوتا نہیں 

آتشِ عشق میں پتھر بھی پگھل جاتے ہیں

صحنِ کعبہ بھی یہیں ہے تو صنم خانے بھی
دل کی دنیا میں گلستان بھی ہیں ویرانے بھی

لوگ کہتے ہیں اجارہ ہے ترے جلووں پر
اتنے ارزاں تو نہیں ہیں ترے دیوانے بھی

آتشِ عشق میں پتھر بھی پگھل جاتے ہیں
مجرم سوز وفا شمع بھی پروانے بھی

کچھ فسانوں میں حقیقت کی جھلک ہوتی ہے
کچھ حقیقت سے بنا لیتے ہیں افسانے بھی

میرے اشعار ہیں تصویرِ تمنا ساغر
ان کی آغوش میں ہیں درد کے افسانے بھی

دور تک کوئی ستارہ ہے نہ جگنو کوئی

یہ  جو  دیوانے  سے  دو  چار  نظر   آتے  ہیں

ان   میں  کچھ  صاحب  اسرار  نظر   آتے  ہیں

تیری محفل کا بھرم  رکھتے  ہیں سو جاتے  ہیں

ورنہ   یہ   لوگ   تو    بیدار   نظر   آتے   ہیں

دور   تک   کوئی   ستارہ  ہے  نہ  جگنو  کوئی

مرگ    امید    کے    آثار    نظر    آتے    ہیں

میرے دامن میں شراروں کے سوا کچھ بھی نہیں

آپ    پھولوں   کے   خریدار   نظر   آتے   ہیں

کل جنھیں چھونہیں  سکتی تھی فرشتوں کی  نظر

آج    وہ    رونق     بازار     نظر    آتے    ہیں

حشر   میں   کون   گواہی  میری  دے  گا  ساغر

سب  تمہارے  ہی  طرف   دار   نظر   آتے  ہیں

تعزیریں عِشق کی

میرے تصوّرات ھیں تحریریں عشق کی
زندانیِ خیال ھیں زنجیریں عشق کی

تعبیرِ حُسن ھے دلِ مجروح کا لہُو
چھینٹے پڑے تو بن گئیں تصویریں عشقِ کی

داغِ فراق، زخمِ وفا، اشکِ خُوں فِشاں
روزِ ازل سے ھیں یہی جاگیریں عِشق کی

شام خزاں کو صُبحِ بہاراں بنا دیا
ترتیب زیست بن گئیں تعزیریں عِشق کی

ساغرجہانِ شوق میں دیکھی ھے جاوداں
اہلِ نظر کے سامنے تفسیریں عِشق کی

میرے دل ناداں سے کچھ بھول ہوئی ہے

برگشتہء یزداں سے کچھ بھول ہوئی ہے
بھٹکے ہوئے انساں سے کچھ بھول ہوئی ہے

تاحّد نظر شعلے ہی شعلے ہیں چمن میں
پھولوں کے نگہباں سے کچھ بھول ہوئی ہے

جس عہد میں لٹ جائے فقیروں کی کمائی
اس عہد کے سلطاں سے کچھ بھول ہوئی ہے

ہنستے ہیں مری صورت مفتوں پہ شگوفے
میرے دل ناداں سے کچھ بھول ہوئی ہے

حوروں کی طلب اور مئے و ساغر سے ہے نفرت
زاہد! ترے عرفاں سے کچھ بھول ہوئی ہے

بھولی ہوئی صدا ھوں مجھے یاد کیجیے

بھولی ہوئی صدا ھوں مجھے یاد کیجیے
تم سے کہیں ملا ھوں مجھے یاد کیجیے

منزل نہیں ھوں خضر نہیں راہزن نہیں
منزل کا راستہ ھوں مجھے یاد کیجیے

میری نگاہ شوق سے ہر گل ھے دیوتا
میں عشق کا خدا ھوں مجھے یاد کیجیے

نغموں کی ابتدا تھی کبھی میرے نام سے
اشکوں کی انتہا ھوں مجھے یاد کیجیے

گم صم کھڑی ھیں دونوں جہاں کی حقیقتیں
میں ان سے کہہ رھا ھوں مجھے یاد کیجیے

ساغر کسی کے حسن تغافل شعار کی
بہکی ھوئی ادا ھوں مجھے یاد کیجیے

جھلملاتے ہوئے اشکوں کی لڑی ٹوٹ گئی

محفلیں لُٹ گئیں جذبات نے دم توڑ دیا

ساز خاموش ہیں نغمات نے دم توڑ دیا

ہر مسرت غمِ دیروز کا عنوان بنی 

وقت کی گود میں لمحات نے دم توڑ دیا 

اَن گِنت محفلیں محرومِ چراغاں ہیں ابھی 

کون کہتا ہے کہ ظلمات نے دم توڑدیا 

اَن گِنت محفلیں محرومِ چراغاں ہیں ابھی 

کون کہتا ہے کہ ظلمات نے دَم توڑدیا 

آج پھر بُجھ گئے جَل جَل کے امیدوں کے چراغ 

آج پھر تاروں بھری رات نے دَم توڑدیا 

جن سے افسانۂ ہستی میں تسلسل تھا کبھی 

اُن محبّت کی روایات نے دم توڑدیا 

جھلملاتے ہوئے اشکوں کی لڑی ٹوٹ گئی 

جگمگاتی ہوئی برسات نے دم توڑ دیا 

ہائے آدابِ محبّت کے تقاضے ساغر 

لب ہلے اور شکایات نے دم توڑدیا 

رُودادِ محبّت کیا کہئیے کُچھ یاد رہی کچھ بھول گئے

رُودادِ محبّت کیا کہئیے کُچھ یاد رہی کچھ بھول گئے 

دو دِن کی مُسرّت کیا کہئیے کُچھ یاد رہی کُچھ بھول گئے

جب جام دیا تھا ساقی نے جب دور چلا تھا محفل میں 

اِک ہوش کی ساعت کیا کہئیے کُچھ یاد رہی کُچھ بھول گیے 

اب وقت کے نازک ہونٹوں پر مجروح ترنّم رقصاں ہے 

بیدادِ مشیّت کیا کہئیے کُچھ یاد رہی کُچھ بُھول گئے

احساس کے میخانے میں کہاں اَب فکر و نظر کی قندیلیں

آلام کی شِدّت کیا کہئیے کُچھ یاد رہی کُچھ بھول گئے 

کُچھ حال کے اندھے ساتھی تھے کُچھ ماضی کے عیّار سجن 

احباب کی چاہت کیا کہئیے کُچھ یاد رہی کُچھ بھول گئے 

کانٹوں سے بھرا ہے دامنِ دِل شبنم سے سُلگتی ہیں پلکیں 

پُھولوں کی سخاوت کیا کہئیے کُچھ یاد رہی کُچھ بھول گئے 

اب اپنی حقیقت بھی ساغر بے ربط کہانی لگتی ہے 

دُنیا کی کی حقیقت کیا کہئیے کُچھ یاد رہی کُچھ بھول گئے