Mein to khud ko tumharay rangon men rang chuka hoon

chalay bhi aao!
keh mein to khud ko tumharay rangon men rang chuka hoon
tumharay saanchon men dhal chuka hoon
tumharay kehnay pay
aa kay dekho
mein khud ko kitna bad'al chuka hoon

Kis liye ab udaas bethi ho?

"Kis liye ab udas bethi ho"

Jab wo ik shakhs dastras men tha

us say milna tumharay bus men tha

us ki aankhain tumhari aankhain thiin

us ki baatain tumhari baatain thiin

us ka chehra tumhara chehra tha

us k dil per tumhara pehra tha

us ki her saans men basi thiin tum

us k her lafz men khili thiin tum

us k sapnon men bhi rachi thiin tum

us ki neendoon men jaagti thiin tum

wo jo kehta tha bay-qarari hai

meri sari wafa tumhari hai

sirf tum say mujhay muhabbat hai

sirf tum say meri haqiqat hai

kitni baatain mein keh naheen sakta

door tum say mein reh naheen sakta

tab tum us k her aik jumlay ko

tab tum us k her aik jazbay ko

ik hansi men urraya karti thiin

sun k tum bhool jaya kerti thiin

us ki aankhon dekhti jab wo

bay-niyazi k dard sehta tha

bhool jana tumhari aadat thi

phir bhi kitna malool rehta tha

apni tanhaaii k galay lag ker

saaray aansoo wo ro gaya ik din

aik pathar say dil lagi ker k

khud bhi pathar ka ho gaya ik din

ab wo tum say tou kuchh naheen kehta

bay-nayazi k dukh naheen sehta

us ki aankhain ab us ki aankhain hain

us ki baatain ab us ki baatain hain

bhool jana tumhari a'adat hai

us ki baatoon ko bhool jaoo na!!

ab wo ik shakhs dastras men naheen

us say milna tumharay bus men naheen

kis liye ab udaas bethi ho?

Meri chaahat tumhain ik bojh sa mehsoos hoti hai

jo yeh sach hai

keh tum meri nigahon men muhabbat parrh naheen saktin

meri dharrkan ki lay per naam apna sun naheen saktin

meri chaahat tumhain ik bojh sa mehsoos hoti hai

tou phir tum ko yaqeen kyun hai?

keh mein nay aaj tak jo kuchh bhi likha hai

wo sab tum par he likha hai

Aaj baad muddat k

aaj baad muddat k

mein nay uss ko dekha hai

woh zaraa nahin badli

ab bhi apni aankhon men

so sawaal rakhti hai

chhoti chhoti baaton pey

ab bhi khul k hansti hai

ab bhi uss k lehjay men

wohi khan'khanahat hai

woh zara nahin badli

ab bhi uss ki palkon k

saaye geelay rehtay hain

ab bhi uss ki sochon men

mera naam rehta hai

ab bhi meri khaatir woh

uss tarha hi paagal hai

woh zara nahin badli

aaj baad muddat k

mein nay uss ko dekha hai

to mujhay bhi lagta hai

mein bhi uss ki chaahat men

uss terha hi paagal hoon

baad itni muddat k

or kuch nahin badla

juz hamaray raston k

or kuch nahin badla

Chupana raaz iss dil k ager tum chorr do jannan

chupana raaz iss dil k
ager tum chorr do jannan
tumhein mujh say muhabbat hai
ager tum bol do jannan
to jeewan k safer men
raasta asaan ho jaaye
hamaray paas bhi jeenay ka kuch samaan ho jaaye
wegerna hum
tumharay dil k derwazay k baahir
aas men bethay rehain gay
tum kabhi to band derwazay ko kholo gi
meray shaanay pey sir rakh ker
kabhi dheeray sa bolo gi
''mujhay tum say muhabbat hai''

kuch dair pehlay neend say

kal raat jaanay kaya HUA

kuch dair pehlay neend say

kuch ashk milnay aa gaye

kuch khawaab bhi tootay huay

kuch log bhi bhoolay huay

kuch raasta bhatki hueen

kuch gard men lipti hueen

kuch be'tarha phaili hueen

kuch khol mein simti hueen

be'rabt si sochain kaee

bhooli hui baatein kaee

ik shaks ki yaadein kaee

phir dair tak jaaga reha

sochon men gum betha reha

ungli sey thanday farsh per

ik naam bas likhta reha

kal raat bhi woh raat thi

kuch dair pehlay neend say

mein der tak rota reha

Haath haathon men jab tumhara tha

haath haathon men jab tumhara tha
khawaab woh zindagi sa pyara tha

mein nay dekhay thay khuwaab men aansoo
yeh bhi shayad koi ishara tha

jo abhi aasmaan sa toota hai!
woh meray bakht ka sitara tha

tum mujhay ghair hi samajh letay
mujh ko yeh bhi sitam gawara tha

ik qadam bhi barha nahin koi
mein nay kis aas say pukara tha

dar reha tha jo bheer say Aatif
uss ko tenhaiyoon nay maara tha

dooriyaan muqadder hain

sogawaar lehjay men
payrr khushk patton say
keh rehay hain patt jharr hay
dooriyaan muqadder hain

Merey andar saans lena chorr day

Merey andar saans lena chorr day

Ay udaasi..! mera peecha chorr day

Chaand kaya aangan men utra hai kabhi

Sun meri jaan…yeh tamanna chorr day

Tu kabhi sukhay huye patton pey likh

Sabz shakhon ka qaseeda chorr day..

Waada

Mera waada hai yeh tum sey

Tumhen main itna chaahun ga

Keh duniya men kaheen par bhi

Muhabbat k hawalay sey

Kabhi jo baat niklay gi

Hamara naam aaye ga..!!!

Ajab Pagal Si Larki Hai

Ajab Pagal Si Larki Hai
Mujhay her khat men likhti hai
“Mujhay tum yaad kertay ho?
Tumhain main yaad aati hooN?”
meri baatain satati hain
meri neendain jagati hain
meri aankhain rulaati hain
december ki sunehri dhoop men abb bhi tehaltay ho?
kisi khamosh rustay sey
koi awaaz aati hai?
Thitharti sard raatoN men
tum abb bhi chhatt pey jaatay ho?
falak k sab sitarooN ko
meri baatain sunatay ho?
kitaboN sey tumharay ishq men koi kami aai?
ya mairi yaad ki shiddat sey aankhoN main nami aai?
Ajab pagal Si larki hai
mujhay her khat men likhti hai..
Jawaban us ko likhta hooN..
meri masroofiyat daikho subah sey shaam office men
chiragh-e-umr jalta hai
phir us k baad duniya kee
kaee majbooriyan paao`n men bairri daal rakhti hain
mujhay bay-fikr, chahat sey bharay sapnay nahin dikhtay
Tehalnay, jaagnay, ronay kee mohlat hee nahin milti
sitarooN sey millay arsa hua..naraaz hon shayad
kitaboN sey shughaf maira abhi waisay he qaayam hai
farq itna parra hai ab unhain arsay men parhta hooN
tumhain kis ney kaha pagli tumhain main yaad kerta hooN
kh main khud ko bhulaanay kee musalsal justajoo men hooN
tumhain na yaad aanay kee musalsal justajoo men hooN
mager yeh justajoo meri bohat nakaam rehti hai
merey din raat men abb bhee tumhari shaam rehti hai
merey lafzoN ki her maala tumharay naam rehti hai
tumhain kis ney kaha pagli tumhain main yaad kerta hooN
purani baat hai jo log akser gungunatay hain
unhain hamm yaad kertay hain jinahin hamm bhool jatay hain
ajab pagal si lerki ho
meri masroofiyat daikho
tumhain dil sey bhulaooN to tumhari yaad aaye na
tumhain dil sey bulanay kee mujhay fursat nahin milti
aur iss masroof jeewan men
tumahray khat ka ikk jumla
“tumhain main yaad aati hooN ?”
meri chahat ki shiddat men kami honay nahin daita
bohat raatain jagaata hai mujhay sonay nahin daita
so agli baar apnay khat men yeh jumla nahin likhna
ajab pagal si larki hai mujhay phir bhee ye likhti hai
mujhay tum yaad kertay ho tumhain main yaad aati hooN ?

عجب پاگل سی لڑکی ہے
مجھے ہر خط میں لکھتی ہے
مجھے تم یاد کرتے ہو؟ تمھیں میں یاد آتی ہوں؟
مری باتیں ستاتی ہیں
مری نیندیں جگاتی ہیں
مری آنکھیں رلاتی ہیں
دسمبر کی سنہری دھوپ میں اب بھی ٹہلتے ہو
کسی خاموش رستے سے کوئی آواز آتی ہے؟
ٹھٹہرتی سرد راتوں میں تم اب بھی چھت پہ جاتے ہو
فلک کے سب ستاروں کو مری باتیں سناتے ہو
کتابوں سے تمھارے عشق میں کوئی کمی آئی
یا میری یاد کی شدت سے آنکھوں میں نمی آئی
عجب پاگل سی لڑکی ہے
مجھے ہر خط میں لکھتی ہے
جوابااس کو لکھتا ہوں
مری مصروفیت دیکھو
سحرسے شام آفس میں چراغ عمر جلتا ہے
پھر اس کے بعد دنیا کی کئی مجبوریاں پاؤں میں بیڑی ڈال رکھتی ہیں
مجھے بے فکر، چاہت سے بھرے سپنے نہیں دکھتے
ٹہلنے، جاگنے، رونے کی فرصت ہی نہیں ملتی
ستاروں سے ملے عرصہ ہوا ناراض ہوں شاید
کتابوں سے شغف میرا ابھی ویسے ہی قائم ہے
بس اب اتنا ہوا ہے میں انھیں عرصہ میں پڑھتا ہوں
تمھیں کس نے کہا پگلی تمھیں میں یاد کرتا ہوں؟
کہ میں خود کو بھلانے کی مسلسل جستجو میں ہوں
تمھیں نہ یاد آنے کی مسلسل جستجو میں ہوں
مگر یہ جستجو میری بہت ناکام رہتی ہے
مرے دن رات میں اب بھی تمھاری شام رہتی ہے
مرے لفظوں کی ہر مالا تمھارے نام رہتی ہے
تمھیں کس نے کہا پگلی مجھے تم یاد آتی ہو؟
پرانی بات ہو جو لوگ اکثر گنگناتے ہیں
انھیں ہم یاد کرتے ہیں جنھیں ہم بھول جاتے ہیں
عجب پاگل سی لڑکی ہو
مری مصروفیت دیکھو
تمھیں دل سے بھلاؤں تو تمھاری یاد آئے نا!
تمھیں دل سے بھلانے کی مجھے فرصت نہیں ملتی
اور اس مصروف جیون میں
تمھارے خط کا اک جملہ
تمھیں میں یاد آتی ہوں
مری چاہت کی شدت میں کمی ہونے نہیں دیتا
بہت راتیں جگاتاہے مجھے سونے نہیں دیتا
سو اگلی بار اپنے خط میں یہ جملہ نہیں لکھنا!
عجب پاگل سی لڑکی ہے، مجھے پھر بھی یہ کہتیہے
مجھے تم یاد کرتے ہو؟ تمھیں میں یاد آتی ہوں؟