aa kisi shaam kisi yaad ki dehleez pey aa

“aa kisi shaam kisi yaad ki dehleez pey aa
umer guzri tujhay dekhay huay behlaaye huay

yaad hay?
Ham tujhay dil maantay thay
Apnay seenay men machalta hua ziddi bacha
Teray har naaz ko ungli sey pakarr kar aksar
Nit naye khawab k bazaar men ley aatay thay
Teray har nakhray ki farmaayesh par
Aik jeevan ki tamannaaon ki beenaai sey ham
Dekhtay thaktay na thay
Sochtay thay
Aik chota sa naya ghar
Naya maahol
Mohabbat ki fiza
Ham donon
Aur kisi baat pey takiyon sey larai apni
Phir larai men kabhi hanstay huay ro parrna
Aur kabhi rotay huay hans parrna
Aur thak haar kar gir parrnay ka masoom khushi bakhsh khayal
Yaad hay?
Ham tujhay sukh jaantay thay
Raat hans deti thi be'saakhta rawish sey teri
Dil teri doori sey ro parrta tha
Yaad hay?
Ham tujhay jaan kaha kartay thay
Teri khamoshi sey mar jatay
Teri aawaz se jee utht'tay thay
Tujh ko choo lenay sey ek zindagi aa jati thi
Sharyaano men
Thaam lenay sey koi shehr sa bas jata tha veerano men
Yaad hay?
Ham tujhay milnay k liye
Waqt sey pehlay pohanch jaatay thay
Aur mulaqat k baad
Ham bohat der sey ghar aatay to kehtay keh hamain
Kuch na kaho ham bohat duur sey ghar aaye hain
Is qadar duur sey ghar aaye hain keh shayad he koi aaya ho
Yaad hay?
Ham tujhay Khuda samajhtay thay magar kufr sey dar jaatay thay
Teray chhin jaanay ka dar theek sey rakhta tha
musalman hamain
aa kisi sham kisi yaad ki dehleez pey aa
teray bhoolay huay raston pey liye phirta hay
emaan hamain
aur kehta hay keh pehchaan hamain
yaad hay ?
ham tujhay emaan kaha kartay thay”

zindagi k mailey men khwahishon k railey men

zindagi k mailey men
khwahishon k railey men
tum sey kaya kahen jaana'n
is qadar jhamailey men
vaqt ki ravani hai
bakht ki garani hai
sakht bezamini hai
sakht la'makani hai
hijr k samandar men
takht aur takhtey ki
ek hi kahani hai
tum ko jo suna'ni hai
baat go zara si hai
bat umr bhar ki hai
umr bhar ki baaten kab
do ghari men hoti hain
dard k samandar men
angint jaziirey hain
be'shumaar moti hain
aankh k dariichey men
tum ney jo sajaya tha
bat us diye ki hai
bat us gilley ki hai
jo lahu ki khilvat men
chor ban k aata hai
lafz ki fasiilon par
tuut tuut jata hai
zindagi sey lambi hai
baat ratjagey ki hai
rastey men kaisey ho
baat takhliye ki hai
takhliye ki baaton men
guftagu izafi hai
pyar karney vaalon ko
ik nigah kafi hai
ho sakay to sun jaao
ek din akailey men
tum sey kaya kahen jaana'an
is qadar jhamailey men

JaB YaAD k GeHRey SanNAtey Men

JaB sHaB k sHaKista ZeenOn Sey MeHTaB UBHArnEy LaGta HAi
JaB GHam k SarD ALaaO Men UmeEDen BuJney LaGti HEin
JaB DiL k sHoRiDA SaManDAr Men AawazEin MarnEy LaGti HEin
JaB MousAm HaAtH NaHi Aattey JaB TitLi BaAt NaHi KarTi
JaB ZinDa ReHna Ek Be'MaaNi kAaM DiKHAi Detta HAi
JaB AnNEy WaLA HAr LamHA DasHnAaM DikHAi Detta HAi
JaB YaAD k GeHRey SanNAtey Men cHeHREy Gum Ho Jattey HEin
JaB DarD sEy BoJHaL AankHon Men GARDAB sEy Parrneyy LaGtey HEin
JaB sHamMEin GuL Ho Jatti HEin JaB kHawaB BikHArnE LaGtey HEin

UsS WaQt AGAr Tum Aa JaaO !

Fursat

aaj barson baad kamra saaf karnay ki mujhay fursat mili

apni almaari say teray haath ka likha hua khat kaya mila

tuu mil gaya

mundamil hotay huay ik zakhm ka muunh khuul gaya

gul khil gaya

aansuon kay saath jaanay kitnay darya beh gaey

saara manzar dhuul gaya

hum nay apna sab kuch haar diya hai teray jooay men

abhi talak aankhon kay baadal men kuch paani baqi hai
lagta hai jeevan men koi gharri suhani baqi hai

hum nay apna sab kuch haar diya hai teray jooay men
aik shikast bachi hai baqi aik veerani baqi hai

yaad hai tum nay aik dafa ik bosa bheja tha mujh ko
dil chaahay to lay jana jo aik nishani baqi hai

kabhi kabhi kaanta sa chubh jata hai seenay men
waqt kay peechay shayd koi yaad puraani baqi hai

Wo Chehray Kesey Hotay Hain Keh " Jin Sey Chaand Sharmaye

Zara Si Dair Ko Sab Kuchh Bhula K Dekh Letey Hain
Tujhey Hum Saamnay Apnay Bitha K Dekh Letey Hain,

Suna Hai Madh Bhari Nazrain Teri Peenay Nahi Detin
Ijazat Ho To Hum Nazrain Mila K Dekh Letey Hain,

Wo Chehray Kesey Hotay Hain Keh " Jin Sey Chaand Sharmaye
Terey Rukh Sey Siyah Zulfain Hata k Dekh Letay Hain,

Shama K Paas Ja Kar Kis Tarah Jaltay Hain Parwaanay
Zara Hum Bhi Terey Nazdeeq Aa K Dekh Letey Hain,

Kahin Be-Taab Dil Ko Es Tarah Sey Chain Aa Jaye
Teri Tasweer Ko Dil Sey Laga K Dekh Letey Hain,

Khayalon Men Tarasha Hai Tera Pekar Bhi Ay Janaa`n
Kabhi Khawabon Men" Tujh Ko Bhi Basa k Dekh Letey Hain !

Titlee jo ek mujh ko mili thi kitaab men

Titlee jo ek mujh ko mili thi kitaab men
Woh apna aks chhorr gayi meri khuwaab men

Ab tak woh merey zehen men uljha sawaal hai
Shaamil rahi jo har gharri merey nisaab men

Aankhon men neend hai na koi khawaab door tak
Rehtey hain hum bhi aaj kal waisey azaab men

Milta hai gardishon sey galay lag k chaand bhi
Aaye they simat k faasley kitney saraab men

Aakhir meri wafa ka mujhey kaya sila mila
Likha na aik harf bhi us ney jawaab men

kitni baateN, keh na kehna thiiN, woh keh bheji hain

Be 'rukhi tum ney bhi kii, uzar-e-zamana kar k

hum bhi mehfil say uth aaey hain, bahana kar k

kitni baateN, keh na kehna thiiN, woh keh bheji hain

ab pashemaan hain, qaasid ko ravana kar k

jaanty hain, wo tunak khoo hay, so apna ehvaal

hum suna dety hain, aouroN ka fasana kar k

kaya kahen, kaya hay un aankhoN men, keh rakh deti hain

aik achay bhalay insaaN ko deewana kar k

koi veerana-e-hasti ki khabar kaya lataa

khud bhi hum bhool gaey, dafn khazana kar k

aankh masroof-e-nazara thi, to hum khush thay Faraz

uss ney kaya zulm kiya, dil men thikana kar k