Friday 6 June 2014

Asaasa



aik aanchal say bandha hai sab kuch

aik tasweer aur tasweer peh bheegay huye hont

aik sandal ki unaabi pencil

aik bey'rabt sa ukhra hua khat

aik adad card

jis ko chooney say teri yaad chali aati hai

aur is card men rakhi hui akloti palak

jis say maanoos duaaon ki mehak aati hai

kisi gumnaam say shaayar ka adhura misra

aik paazaib say bichra hua ujla mauti

aik murjhai hui zard chanbeli ki kali

jis men ab bhi teri zulfon kay bhanwar liptay hain

aik boseeda sa question paper

jis kay konay peh likha naam abhi taaza hai

sharbati kaanch ki tooti hui naazuk choori

aik toota hua halka sa gulabi naakhun

aik gadla sa tissue paper bhi

jis peh mehkay huye ashkon kay nishaan zinda hain

yahi daulat hai yahi kuch hai asaasa mera

yahi daulat hai yahi kuch hai asaasa mera

aik aanchal say bundha hai sab kuch!

aik bheegay huye aanchal say bundha hai sab kuch!!!


No comments:

Related Posts Plugin for WordPress, Blogger...
Blogger Wordpress Gadgets