Pehlay Unwaan Tha Wafa Ka Jo Shakhs

Silsila Sa Janaab ! Banta Gaya
Ik Haqeeqat Wo Khwaab Banta Gaya

Aks Paani Men Dekhnay K Liye
Kaisay Chehra Gulaab Banta Gaya

Ham Ney Koi Sawaal Tak Na Kiya
Wo Mukammal Jawaab Banta Gaya

Pehlay Unwaan Tha Wafa Ka Jo Shakhs
Baad Men Wo Kitaab Banta Gaya

Neend Ka Tootna Bhee Apni Jagah
Khwaab Bhee Ek Azaab Banta Gaya

Dekhnay Men Tha Ek Lafz Magar
Ishq Poora Nisaab Banta Gaya

Ham Haqeeqat Samajh Rahay Thay Jisay
Rafta Rafta Saraab Banta Gaya

Saaray Aalam Men Ham Huway Tanha
Sab Ka Wo Intekhaab Banta Gaya

Pehlay Dil Torrna Bura Tha "Batool"
Baad Men Yeh Sawaab Banta Gaya