Jin ki qismat Sehr nahi, hum hain

Itna khaali tau ghar nahi, hum hain!
Hum nahi hain magar nahi, hum hain!!

Chashm-e-dushman k khauf sey poocho
Nok-e-naiza pey sir nahi, hum hain

Shaam-e-tanhai gham na kar keh tera
Koi bhi humsafar nahi, hum hain

Chand sey keh do, be dharak utrey
Ghar men dewaar-o-dar nahi, hum hain

Woh jo sab sey hain be khaber, tum ho
Jin ko apni khaber nahi, hum hain

Kyun jalaatey ho jhonpri apni?
Is men laal-o-gohar nahi, hum hain

Hum hain humzaad, raat k Mohsin
Jin ki qismat Sehr nahi, hum hain