main aaina tha, woh mera khayal rakhti thi
main toot-ta tha to chun kar sambhaal rakhti thi
har aik maslay ka hal nikaal rakhti thi
zaheen thi, mujhay hairat main daal rakhti thi
main jab bhi tark-e-ta'aluq ki baat karta tha
woh rokti thi mujhay, kal pay taal rakhti thi
bas aik woh thi jisay ghaao, main dikhata tha
bas aik woh thi keh jo andmal rakhti thi
woh meray dard ko chunti thi apni poron say
woh meray wastay khud ko nidhaal rakhti thi
woh doobnay nahi daiti thi dukh kay darya main
meray wajood ki naao uchaal rakhti thi
duayen us ki balaaon ko rok laiti thin
woh meray chaar soo haathon ki dhaal rakhti thi
ik aisi dhun keh nahi phir kabhi main nay suni
woh munfarid sa hansi main kamaal rakhti thi
usay nadamatain meri kahan gawara thin
woh meray wastay asaan sawaal rakhti thi
bichar kay uss say main dunya ki thokaron main hoon mohsin
woh pass thi tau mujhay lazawaal rakhti thi
No comments:
Post a Comment