Main Tum Ko Bhool Jaaun Ga…!!!

Mujhay Iss Zindgani Sey Koi Shikwa Nahi Lekin,
Zara Si Be Sakooni Hay,
Na Janay Kyun Meray Dil Men,
Ajab Ik Khauf Rehta Hay,
Mujhay Mehsoos Hota Hay,
Keh Meray Dil K Darwazey Pey,
Teri Yaad Ki Dastak Men Vo Shiddat Nahi Baqi,
Bohat Si Khas Baatein Hain,
Jo Mujh Ko Aam Lagti Hain,
Meray Dil Men Unhein Sun Kar Koi Toofan Nahi Uthta,
Teri Aankhein,Tera Chehra,
Teri Awaaz Ki Rimjhim,
Sabhi Kuch Khawab Lagta Hay,
Mujhay Mehsoos Hota Hay,
Sunehrii Titliyoon Jaisay,
Vo Sab Khush Rung Sey Sapney,
Meray Lafzon K Phoolon Par,
Bohat Din Sey Nahi Baithay,
Mujhay Mehsoos Hota Hay,
Samay Ki Tez Lehron Ney,
Hamaray Rait K Kachay Gharonday Torr Dalay Hain,
Mujhay Un Tez Lehron Sey,
sunehrii Titlion Jaisay,
Sabhi Khush Rung Sapnon Sey,
Koi Shikwa Nahi Lekin,
Zara Si Be Sakooni Hay,
Mujhay Mehsoos Hota Hay,
Tumharay Dil K Darwazey Pe Meri Yaad Ki Dastak,
Meri Jaan Ab Nahi Hoti,
Meri Jaan Ab Nahi Hoti,
Keh Meri Yaad Aaye To,
Tumhari Aankh Bhar Aaye,
Duayen Mangtey Lamhay,
Mujhay Tum Bhool Jati Ho,
Magar Phir B Mujhay Tum Sey,
Koi Shikwa Nahi Lekin,
Ajab Si Be Sakooni Hay,
Ajab Ik Khauf Hay Dil Mein,
Main Tum Ko Bhool Jaaun Ga…!!!