Biitaa Diid Ummiid Kaa Mausam, Khaak uRtii Hai AaNkhon Men

kab tak dil kii Khair manaayen, kab tak raah dikhaao gay
kab tak chain kii mohalat do gay, kab tak yaad na aao gay




biitaa diid ummiid kaa mausam, Khaak uRtii hai aaNkhon men
kab bhejo gay dard kaa baadal, kab barkhaa barasaao gay




ehad-e-vafaa aur tark-e-muhabbat jo chaaho so aap karo
apane bas kii baat hii kyaa hai, hamase kyaa manavaao gay




kis nay vasl kaa suuraj dekhaa, kis par hijr kii raat Dhalii
gesuon vaale kaun thay, kyaa thay, un ko kyaa jatalaao gay




'Faiz' dilon kay bhaag men hai ghar basanaa bhii luT jaanaa bhii
tum us husn kay lutf-o-karam par kitanay din itaraao gay