Barish-e-Wasal Wo Hui Saraa Ghubaar Dhul Gaya

Kat Hi Gai Judai Bhi Kab Yeh Hua Keh Mer Gaye
Terey Bhi Din Guzar Gaye Merey Bhi Din Guzar Gaye

Terey Liay Chaley Thay Hum Terey ieay Theher Gaye
Tuu Ney Kaha To Jee Uthay Tuu Ney Kaha To Mer Gaye

Waqt Hi Kuch Judai Ka Itna Taweel Ho Gaya
Dil Men Terey Wisaal K Jitney Thay Zakhm Bhar Gaye

Hota Raha Muqabla Paani Ka Aur Piyaas Ka
Sehra Umad Umad Parray Darya Bipher Bipher Gaye

Woh Bhi Ghubar-e-Khuwab Tha Hum Bhi Ghubar-e-Khuwab Thay
Woh Bhi Kahin Bikhar Gaya Hum Bhi Kahin Bikhar Gaye

Raah Men Milay Thay Hum Raahain Naseeb Bann Gaeen
Tuu Bhi Na Apney Ghar Gaya Hum Bhi Na Apney Ghar Gaye

Koi Kinar-e-Aab-e-Joo Betha Hua Hay Sir'Nigoon
Kashti Kidhar Chali Gai Janay Kidher Bhanwar Gaye

Aaj Bhi Intizar Ka Waqt Hanoot Ho Gaya
Aisay Laga Keh Hashr Tak Saray Hi Pal Theher Gaye

Barish-e-Wasal Wo Hui Saraa Ghubaar Dhul Gaya
Woh Bhi Nikhar Nikhar Gaya Hum Bhi Nikhar Nikhar Gaye

Aab-e-Muheet-e-Ishq Ka Beher Ajeeb Beher Hay
Tairay To Gharq Ho Gaye Doobay To Paar Utar Gaye .. !