Mujh Ko Bhi Uss K Saamnay Ek Baar Le Chalo

Rakht-E-Safar Yunhi To Na Bekaar Lay Chalo
Rasta Hai Dhoop Ka, Koi Dewaar Lay Chalo


Taaqat Nahi Zubaan Main To Likh Loon Dil Ki Baat
Koi To Saath Soorat-E-Izhaar Lay Chalo


Dekhoon To Bdal K Wo Bhala Kesa Ho Gaya
Mujh Ko Bhi Uss K Saamnay Ek Baar Le Chalo


Kab Tak Nadi Ki Teh Main Utaaro Gay Kashtiaan
Abb K To Haath Main Koi Patwaar Lay Chalo


Parti Hain Dil Pe Gham Ki Agar Silwatain To Kia
Chehray Pe To Khushi K Kuch Aasaar Lay Chalo


Jitney Bhanwar Kaho Gay Pehen Loonga Jism Per
Ek Baar To Nadi K Mujhe Paar Lay Chalo


Kuch Bhi Nahi Ager To Hatheli Pay Jaan Sahi
Tohfa Koi To Uss K Leay Yaar Lay Chalo


Jungle Main Aaey Ga Koi Gaahak Kahan Adeem
Bikna Hai Ger To Saath Khareedaar Lay Chalo