پھر یوں ہوا کہ نقشِ قدم تھے کوئی نہ تھا

پھر یوں ہوا کہ نقشِ قدم تھے کوئی نہ تھا
جس راہگذارِ کرب میں ہم تھے کوئی نہ تھا

پُرخار وادیوں کی صدا تھی لہو لہو
برہم مزاج دشتِ ستم تھے کوئی نہ تھا

کچھ لوگ نقش چھوڑ گئے تھے چٹان پر
پتھر پہ چند نام رقم تھے کوئی نہ تھا

ہم غمگسارِ خلقتِ شہر فسردہ تھے
جب ہم اسیرِ رنج و الم تھے کوئی نہ تھا

ماتم کی صف بچھی تھی مگر ماتمی نہ تھے
دیوار و در مرقع غم تھے کوئی نہ تھا

اُس کے جلو میں سنگ زنوں کا ہجوم تھا
بارانِ سنگ و خشت میں ہم تھے کوئی نہ تھا

اشعر جب اُن کا اِسمِ گرامی لکھا گیا
قرطاس تھا نہ لوح و قلم تھے کوئی نہ تھا