Rakht-E-Safar Yunhi To Na Be'kaar Ley Chalo
Rasta Hai Dhoop Ka, Koi Dewaar Ley Chalo
Taaqat Nahi Zubaan Men To Likh Loon Dil Ki Baat
Koi To Saath Soorat-E-Izhaar Ley Chalo
Dekhoon To Badal Kay Wo Bhala Kesa Ho Gaya
Mujh Ko Bhi Uss Kay Saamnay Ek Baar Ley Chalo
Kab Tak Nadi Ki Teh Men Utaaro Gey Kashtiyaan
Abb Kay To Haath Men Koi Patwaar Ley Chalo
Parrti Hain Dil Pey Gham Ki Ager Silwatain To Kaya
Chehray Pey To Khushi Kay Kuch Aasaar Ley Chalo
Jitney Bhanwar Kaho Gey Pehen Loonga Jism Per
Ek Baar To Nadi Kay Mujhey Paar Ley Chalo
Kuch Bhi Nahi Ager To Hatheli Pey Jaan Sahi
Tohfa Koi To Uss Kay Liay Yaar Ley Chalo
Jungle Men Aaye Ga Koi Gaahak Kahan Adeem
Bikna Hai Ger To Saath Khareedaar Ley Chalo
Pakistan Rupee Exchange Rate
No comments:
Post a Comment