Tum gaey ho to sar e shaam yeh aadat thehri

Lakh doori ho magar ehad nibhatey rehna
Jab bhi barish ho mera sog manatey rehna

Tum gaey ho to sar e shaam yeh aadat thehri
Bus kinarey pey kharrye hath hilatey rehna

Jaaney is dil ko yeh adaab kahan sey aaye
Us ki raahon men nigahon ko bichaatey rehna

Aik muddat sey yeh maamool huwa hai ab to.
Aap hi roothna aap hi manaatey rehna

Tum ko maaloom hai Farhat, yeh pagal pan hai
Door jaatey huwey logon ko bulaatey rehna