نہیں نہیں میں بہت خُوش رہا ہوں تیرے بغیر

کوئی ملا تو کسی اور کی کمی ہوئی ہے
سو دل نے بے طلبی اختیار کی ہوئی ہے

جہاں سے دل کی طرف زندگی اُترتی تھی
نگاہ اب بھی اُسی بام پر جمی ہوئی ہے

تم آگئے ہو تو اب آئینہ بھی دیکھیں گے
ابھی ابھی تو نگاہوں میں روشنی ہوئی ہے

ہے انتظار اسے بھی تمہاری خُوشبو کا
ہوا گلی میں بہت دیر سے رُکی ہوئی ہے

نہیں نہیں میں بہت خُوش رہا ہوں تیرے بغیر
یقین کر یہ حالت ابھی ابھی ہوئی ہے

ہمارا علم تو مرہونِ لوحِ دل ہے میاں
کتابِ عقل تو بس طاق پر دھری ہوئی ہے

بناؤ سائے، حرارت بدن میں جذب کرو
کہ دھوپ صحن میں کب سے یوں ہی پڑی ہوئی ہے

وہ گفتگو جو مری صرف اپنے آپ سے تھی
تری نگاہ کو پہنچی تو شاعری ہوئی ہے