Neend to khawaab hai aur hijr ki shabb khawab kahan

نیند تو خواب ہے اور ہجر کی شب خواب کہاں
اِس اماوس کی گھنی رات میں مہتاب کہاں

رنج سہنے کی مرے دل میں تب وتاب کہاں
اور یہ بھی ہے کہ پہلے سے وہ اعصاب کہاں

مَیں بھنور سے تو نکل آئی،اور اب سوچتی ہوں
موجِ ساحل نے کیا ہے مجھے غرقاب کہاں

مَیں نے سونپی تھی تجھے آخری پُونجی اپنی
چھوڑ آیا ہے مری ناؤ تہہِ آب کہاں

ہے رواں آگ کا دریا مری شریانوں میں
موت کے بعد بھی ہوپائے گا پایاب کہاں

بند باندھا ہے سَروں کا مرے دہقانوں نے
اب مری فصل کو لے جائے گا سیلاب کہاں


Neend to khawaab hai aur hijr ki shabb khawab kahan
Is amawas ki ghanni raat men mehtaab kahan

Ranj sehney ki merey dil men tab-o-taab kahan
Aur yeh bhi hai keh pehley sey wo asaab kahan

Men bhanwar sey to nikal aayi, aur ab sochti hoon
Mauj-e-saahil ney kiya hai mujhey gharqaab kahan

Mein ney sonpi thi tujhey aakhri poonji apni
Chorr aaya hai meri naao tah-e-aab kahan

Hai rawaa'n aag ka dhuwaan meri sharyaanon men
Maut k baad bhi ho paaye ga paayaab kahan

Band baandha hai saron ka merey dehqaanon ney
Ab meri fasal ko ley jaaye gA sailaab kahan