Kiyun Roti Ho?

Kiyun Raat Ki Rait Pey Bikharay Huey
Taaron Key Kankar Chunti Ho?
Kiyun Sannaatey Ki Silwat Mey
Lipti Awaazain Sunti Ho?
Kiyun Apni Pyasi Palkon Ki Jhaalar Mey
Khuwab Paroti Ho?
Kiyun Roti Ho?

Abb Kon Tumhari Aankhon Main
Sadiyon Ki Neend Undailey Ga?
Abb Kon Tumhari Chahat Ki
Haryali Mein Khul Khelay Ga?
Abb Kon Tumhari Tanhai Ka
Un-Dekha Dukh Jhelay Ga?

Abb Aisa Hai?
Yeh Raat Musalat Hai Jab Tak
Yeh Shammain Jab Tak Jalti Hain...
Yeh Zakhm Jahan Tak Chubhtay Hain
Yeh Sansain Jab Tak Chalti Hain

Tum Apni Soch Kay Jungle Main Raa'h Bhatko Aur Phir Kho Jao
Abb Soo Jao