Suna Hai Aisa Maseeha Kaheen Sey Aaya Hai

Chalo Keh Koocha-e-Dildaar Chal K Dekhtey Hain
Kisey Kisey Hai Yeh Azaar Chal K Dekhtey Hain,

Suna Hai Aisa Maseeha Kaheen Sey Aaya Hai
Keh Usko Shehar K Beemaar Chal K Dekhtey Hain,

Hum Apney Butt Ko, Zulaykha Liye Hai Yousaf Ko
Hai Kon Ronaq-e-Bazaar Chal K Dekhtey Hain,

Suna Hai Deer-o-Haram Men To Woh Nahi Milta
So Ab K Usko Sar-e-Daar Chal K Dekhtey Hain,

Us Aik Shakhs Ko Dekho To Aankh Bharti Nahi
Us Aik Shakhs Ko Har Baar Chal K Dekhtey Hain,

Woh Merey Ghar Ka Karey Qasd Jab To Saaye Sey
Kaii Qadam Dar-o-Deewar Chal K Dekhtey Hain,

Faraz Aseer Hai Uska K Woh Faraz Ka Hai
Hai Kon ? Kis Ka Gariftaar ? Chal k Dekhtey Hain