kahan aa k ruknay thay rastay kahan morr tha usay bhool ja

kahan aa k ruknay thay rastay kahan morr tha usay bhool ja
woh jo mil gaya usay yaad rakh jo nahi mila usay bhool ja

woh teray naseeb ki barishain kisi or chhat pey baras gayeen
dil e be'khabar meri baat sun usay bhool ja usay bhool ja

main to gum tha teray he dhayan men,teri ass men teray gumaan men
sabaa keh gaee rok k meray kaan men,meray sath aa usay bhool ja

kisi aankh men nahin ashk-e-gham,teray baad kuch bhi nahin hai kam
tujhy zindagi ney bhula dia,tu bhi muskura usay bhool ja

kyun atta hua hai ghubaar men,gham-e-zindagi k fishaar men
woh jo darj tha teray bakht men so woh ho gaya,usay bhool ja

na wo aankh he teri aankh thi,na wo khawab he tera khawab tha
dil-e-muntazir to yeh kis liye tera jaagna,usay bhool ja

yeh jo raat din ka hai khayal sa,usay dekh us pey yakeen na kar
nahin aks koi bhi mustaqil,sar-e-aina usay bhool ja

jo basaat ay jaan he ulat gaya,wo jo rastay sey palat gaya
usay roknay sey hasool kaya,usay mat bula usay bhool ja

to yeh kis liye shab-e-hijar k usay her sitaray men dekhna
wo falak keh jis men milay thay hum,koi or tha usay bhool ja

mujhey chand ban k mila tha jo,teray sahilon pey khila tha jo
woh tha aik daryaa wisaal ka,so utar gya usay bhool ja