Ru-Baruu Wo Hai Ibaadat Kar Raha Huun

Ru-Baruu Wo Hai Ibaadat Kar Raha Huun
Us k Chehray Ki Tilaawat Kar Raha Huun

Lo Kharido Ik Nazar K Moul Mujhko
Apni Qeemat Mein Rayaa'et Kar Raha Huun

Lii Hai Sabr-o-Zabt Ney Mujh Sey Ijaazat
Apney Mehmaanon Ko Rukhsat Kar Raha Huun

Chhin Gaya Mulk-e-Jawaani Bhi Tou Kaya Gham ?
Ab Bhi Yaadon Per Hukoomat Kar Raha Huun

Koi Bhi Gham Usko Loutaaya Nahi Hai
Yun Amaanat Men Khayaanat Kar Raha Huun

Usney Tou Bas Ik Zara Si Baat Chairri
Mein Wazaahat Per Wazaahat Kar Raha Huun

Ishq Kar k Aap Bhi Ban Jaayein Insaan
Sheikh Sahab Ko Naseehat Kar Raha Huun

Aashiqui Tufaan-e-Girya Chahti Hai
Aur Mein Aahon Per Qana’at Kar Raha Huun

Aasmaan Jo Shakhs Hai Sab Ki Nazar Mein
Usko Chhuu Lainay Ki Jurrat Kar Raha Huun

Mein Ney Dekha Hai Qateel Us Ka Saraapa
Mein Kahaan Zikr-e-Qayamat Kar Raha Huun ???