hasrat hai tujhey saamney baithey kabhi dekhuun

hasrat hai tujhey saamney baithey kabhi dekhuun
main tujh sey mukhatib huun tera haal bhi puchuun

dil men hai mulaqat ki khwahish ki dabi aag
mehndi lagey haathon ko chupa kar kahan rakhuun

jis naam sey tu ney mujhey bachpan sey pukara
ik umr guzarney pey bhi wo naam na bhuluun

tu ashk hi ban k meri aankhon men sama ja
main aaina dekhuun to tera aks bhi dekhuun

puchuun kabhi gunchon sey sitaron sey hawa sey
tujh sey hi magar aa k tera naam na puchuun

ay meri tamanna k sitarey tu kahan hai
tu aaye to yeh jism shab-e-gam ko na saunpoon