پھر سے انا گنوانے کی خواہش نہیں رہی

اب شہرِ جاں بچانے کی خواہش نہیں رہی
پھر سے انا گنوانے کی خواہش نہیں رہی

کتنے عجیب موڑ پہ بچھڑے ہیں اب کے ہم
اب تو کسی بہانے کی خواہش نہیں رہی

مٹھی سے اس طرح سے مقدر پھسل گیا
جھک کر اسے اٹھانے کی خواہش نہیں رہی

سورج کو بادلوں نے پناہوں میں جب لیا
پھر ان کو گھر لٹانے کی خواہش نہیں رہی

اب تم پلٹ کے آنے کی خواہش کو مار دو
اب تم کو آزمانے کی خواہش نہیں رہی

اب کے خدا سے بھی نہیں مانگا اسے بتول
اب سر کہیں جھکانے کی خواہش نہیں رہی