Kabhi Tumhen Bhi Muhabbat Ney Maat Di Ho gi

Kabhi Kabhi Yun Hi Dil men Gumaan Sa Hota Hai,
Kabhi Tumhen Bhi Muhabbat Ney Maat Di Hogi,
Tumhaarey Dil k Dharakney Ka Aakhri Mousam,
Kahi'n Haseen Nazaaron Men Kho Gaya Hoga,
Tumhaarey Dil Men Machalta Huwa Koi Armaan,
Wo Sard Chandni Raaton men So Gaya Hoga,
Tumhaarey Saaz-e-Muhabbat k Taar Jab Tootey,
Milan ka Geet Saraabon men Kho Gaya Hoga,
Kabhi Kabhi Yun Hi Dil men Gumaan Sa Hota Hai....

Guzartey Waqt ney Phir Zakham Bhar diye Hon gey,
Tumhaarey Chaak Girebaan bhi See Diye Hon gey,
Tumhaarey Ashk Sitaaron ney Chun liye Hon gey,
Tumhaarey Khawaab Nazaaron Ney Bun liye Hon gey,
Yeh Sab to Theek Hai Lekin Tumhaarey Dil Ka Naqeeb,
Tumhaari Zeest ki Raahon men Chupp Gaya Hoga,
Tumhaari Khojti Aankhon men Aur Dil k Qareeb,
Woh Ek Dard-e-Musalsal keh Bas Gaya Hoga,
Kabhi Kabhi Yun Hi Dil men Gumaan Sa Hota Hai...

Tumhaari Sharbati Aankhon men EK Nami si Hai,
Tumhaari Zeest men Shayad Koi Kami si Hai,
Tumhaarey Sard Badan Aur Laraztey Ho'nton Par,
Kabhi Jo Barf Giri Thi Woh Ab Jami si Hai,
Tab Hi To Tum ko Kisi Baat ka Khayaal Nahi,
Magar Mujhey Bhi Tagaful ka Kuch Malaal Nahi,
Main Mutma'in Huun keh Tum Chup Ki Dast-Ras men Ho,
Tumhaarey Ho'nton par Merey Liye Sawaal Nahi,
Magar Yeh kaya keh Jigar men Dhuwaa'n sa Hota Hai,

Kabhi Kabhi Yun Hi Dil men Gumaan Sa Hota Hai,
Kabhi Tumhen Bhi Muhabbat Ney Maat Di Ho gi