raat chiraaGhoN kii mahfil meN, shaamil ek zamaana thaa
lekin saath meN jalney vaalii, raat thii yaa parwaanaa thaa
Khizr nahiiN rahzan hii hogaa, raah meN jis ney looT liyaa
lekin yaaro shak hotaa hai, kuchh jaanaa pahchaana thaa
shab bhar jis rudaad-e-alam par, ashk bahaatey guzrii thii
subah hu_ii to hamney jaanaa, apnaa hii afsaanaa thaa
kaun hamaarey dard ko samjha, kisney Gham meN saath diyaa
kehney ko to saath hamaarey, tum kyaa, ek zamaanaa thaa
log isey jo chaahey kah leN, apnaa to yeh haal rahaa
sirf unhiiN sey zaKhm miley haiN, jin sey kuchh yaaraana thaa
maslehatoN kii is bastii meN, lab khultey, yeh taab naa thii
vaz'a junooN kii baat na poochho, vo bhii ek bahaana thaa
talKhi-e-Gham pohaNchey they bhulaaney, sood-o-ziyaaN meN uljhey haiN
baadaa_faroshoN kii maNDii thii, naam magar mai_Khaanaa thaa
nabz kii Khaatir ham ney apnaa, zauq-e-talab badnaam kiyaa
aaj vahii kehtey haiN haNs kar, shaayar thaa, diivaanaa thaa
Pakistan Rupee Exchange Rate
No comments:
Post a Comment