hum jo tootay to is terha tootay
jesay haathon say gir kay pathar pay
koi shafaaf aaina tootay
jesay palkon say toot'ta aansu
jesay seenay men ik gumaan tootay
jesay umeed ki nazuk daali
jesay aankhon men khawab ki dori
waqt e taveel men ulajh jaaey
jesay pairon talay say zameen nikal jaaey
jesay sar pay aasman tootay
jesay aik shaakh pay bharosa kiya
us pay jitnay thay aashiyaan tootay
jesay wehshat say hosh aa jaaey
jesay ta dair men dhayan tootay
kis nay dekha tha tootna apna
hum jo tootay to raaigaan tootay
Pakistan Rupee Exchange Rate
No comments:
Post a Comment