Gum Sum Huwa Awaaz Ka Darya Tha Wo Ek Shakhs

Gum Sum Huwa Awaaz Ka Darya Tha Wo Ek Shakhs
Pathar bhi naheen ab woh sitara tha jo ik shakhs 

Shayad woh bhi koi harf-e-wafa dhoond raha tha 
Chehron ko barray ghor sey parhta tha woh ik shaks 

Sehraa kee tarah dair sey pyasa tha woh shayad 
Baadal kee tarah toot key barsa tha woh ik shakhs 

Ay taiz hawa kuch khabar us kay janoon kee! 
Tanha safr-e-shouq pey nikla tha jo ik shakhs 

Ab aakhree satron men kaheen naam hai us ka 
Ehbaab kee feh'rist men pehla tha jo ik shakhs 

Haathon men chhupaaey huay phirta hai kaii zakham 
Sheeshay key khilonon sey behalta tha jo ik shakhs 

Mur mur key usay dekhna chahain meri aankhain 
Kuchh door mujay chhornay aaya tha jo ik shakhs 

Har zehan men kuchh naqsh-e-wafa chhorr gaya hai 
Kehnay ko bharay shehar men tanha tha jo ik shakhs 

Munkar hai wohee ab meri pehchan ka Mohsin 
Aksar mujay khat khoon sey likhta tha jo ik shakhs