Baaz_gasht

aisii hii sard shaam thii voh bhii
jab vo mehndi rachaaye haathoN meN
apnii aahaT k Khauf sey larzaaN
surKh aaNchal meN muuNh Chhupaaye huey
apney Khat mujh sey leney aayii thii
us kii sehmii huii nigaahoN meN
kitnii Khaamosh iltijaayeN thiiN
us k chehrey kii zard rangat meN
kitnii majabuurioN k saaye they!
merey haathoN sey Khat pakaRtey hii
jaaney kayaa soch kar achaanak voh,
meraa shaanaa pakaR k royii thii
us k yaaquut rang hoThoN k
kap_kapaatey huey kinaaroN par
sainkRoN an'kahey fasaaney they !
sard shaamoN meN der tak aksar
jab yeh manzar dikhaayii detaa hai
ek lamhaa hinaayii haathoN sey
mujh ko apnii taraf bulaataa hai
ham_nashiiN ruuThh kar na jaa mujh sey!
aisii hii sard shaam thii vo bhii!