tumhari jeet ki khatir…yeh baazi jis ney haari hey

Suno keh raigzaar-e-umr ka yeh aakhri zarra
meri be- jaaN hathaili sey…phisalta jaa raha hey ab
meri guzri musafat ki thakan ab ood aai hey
merey qasid…suno..jaanay say pehlay itna kehna hey
merey ujray shehar k un gali koochoN meN jaao tou
jahaN bachpan bitaya tha…jahaN sab kuch ganwaya tha
tou us weeran khandar ko..payaam-e-aakhri daina
waheeN aangan meN daayeN haath pey…ik pairr daikho gay
usi boorhay shajar k… sin raseeda say badan par tum
merey bay rang haathoN ki lakeeroN ki tarha…ik jaal daikho gay
usi peepal ki chaaooN meN…
kisi masoom k dil ney..kaii sapnay sajaye thay
kisi ki aankh k aansu…kisi dil ney bahaaye thay
kisi ki jheel aankhoN ney…kaii saagar lutaye thay
bohat narmi say us peepal ko chhuu kar..itna keh daina
keh ab aankhoN k yeh darya…kahiN saagar nahiN rotay
muqaddar jinka sota hai….kabhi phir woh nahiN sotay
usay kehna merey qasid..!
jinhoN ney umr saari teri chhaaoN meN basar kar di
woh aakhri pal tumharay pas aa kar..kuch na keh paye
lipat kar tum say ro laiN gay..agar duniya meN reh paaye
suno qaasid..!!
wahaN say chand qadam k faslay par…aik chokhat hey
whi chokhat hey yeh piyaray…
jahaN sajday kiye hum ney…jahaN par zindagi haari
jahaN kuch pal jiye hum ney….jahaN par jaan yeh waari
jawaaN margi pey meri shehar yeh maatam kunaaN hoga
magar…us aik chokhat par…ajab sa hi samaaN hoga..
wahaN raqsaaN sabhi chehroN pey kuch raanaaiyaaN hoNgi
wahaN bajti chaharoN su…bohat shehnaaiyaN hoNgi
wahaN jiski nazar meN jeet janay ki thakawat ho
magar…us dil nasheeN chehray pey..gehri muskurahat ho
samajh laina merey qaasid…yehi qatil mera thehra..!
meri aankhaiN yeh lay jaao…mera yeh kaam kar daina
usay ji bhar k takna tum….meri aankhoN meN bhar laina
usay chupkey say keh daina
“tumhari jeet ki khatir…yeh baazi jis ney haari hey….
nahiN tum ho sakay uskey….woh mar kar bhi tumhari hey…
“nahiN…balkeh…merey qaasid…
usay tum kuch nahiN kehna