Mujhay ik khawab ka taawaan bharna hai

Suno logo !
Meri aankhain khareedo gey
Bohat majboor halaat men mujhay neelaam karni hain
Koi mujh say naqad lay lay
Main thorray daam kar doon ga
Jo pehli boli day day ga
Usi kay naam kar doon ga
Mujhay bazaar waalay keh rahay hain kam aql taajir 
Aray suno logo !
Nahin hoon main hirs ka khawahaan
Nafa nuqsaan ki shatranj nahin main khelnay aaya
Koi mujh ko kahay na manchala sa be'hunar taajir
Bata paaoon tumhain kesay
Kis tashweesh men hoon main

Suno logo !
Barri mehboob tar hain mujh ko meri neem tar aankhain
Magar ab baichta hoon keh
Mujhay ik khawab ka taawaan bharna hai.