us ko judaa huey bhi zamaanaa bohat huaa
ab kaya kahen yeh qissaa puraanaa bohat huaa
dhalti na thi kisi bhi jatan sey shab-e-firaaq
marg-e-naa'gahaan tera aanaa bohat huaa
hum khuld sey nikal to gaye hain par ay khudaa
itney sey vaaq'ye kaa fasaanaa bohat huaa
ab hum hain aur saarey zamaaney ki dushmani
us sey zaraa rabt barhaanaa bohat huaa
ab kyun na zindagi pey muhabbat ko vaar den
is aashiqi men jaan sey jaanaa bohat huaa
ab tak to dil ka dil sey ta'arruf na ho sakaa
maanaa keh us sey milna milaanaa bohat huaa
kaya kaya na hum kharaab huey hain magar yeh dil
ay yaad-e-yaar tera thikaanaa bohat huaa
kehta thaa naasey'hon sey merey muunh na aaio
phir kaya thaa ek huu kaa bahaanaa bohat huaa
lo phir terey labon pey usi bevafaa ka zikr
ahmad 'faraz' tujh sey kahaa naa bohat huaa
Pakistan Rupee Exchange Rate
No comments:
Post a Comment