Pyar Ki Saalgirah Tum Kis K Sath Manao Gi

Kitni Shaamein Roshan Hon gi Kitney Deep Jalao Gi,
Pyar Ki Saalgirah Tum Kis K Sath Manao Gi.

Main To Rukhsat Ho Hi Raha Tha Aaj Tumhari Galiyon Sey,
Ab Tum Kis K Sath Raho Gi Kis Ka Sath Nibhao Gi.

Aakhir Woh Din Kab Aaye Ga Jab Khalwat Men Mujh Sey Tum,
Merey Dil Ka Haal Suno Gi, Apna Haal Sunao Gi.

Farz Karo Agar Baad-e-Furqat Main Tum Ko Mil Jaaun To,
Hairat Men Parr Jaao Gi, Ya Seeney Sey Lag Jaao Gi.

Jaaney Sey Pehley Bas Itna Soch Lo Gar To Behtar Hai,
Dil Ki Galiyaan Band Milen Gi Jab Tum Loat K Aao Gi.

Theek Hai Tum Lotaa Do Mujh Ko Merey Tohfey Aur Khatoot,
Lekin Jo Din Pyar Men Guzrey Woh Kaisey Lotaao Gi.

Ho Jao Tum Laakh Kisi Ki Lekin Phir Bhi Tum,
Mujh Sey Hi Mansoob Raho Gi Meri Hi Kehlaao Gi..