Jab lafz merey dard ki shiddat sey ghayal they

Hawa....!

Tum jaanti ho sab

Keh mein ney raat k pichley pehar

chupkey sey saari dastaan tum ko sunaaii thi

Tumhen to yaad hi ho ga

Tabhi...

Jab ashk meri baat k rastey men hayal they

Tabhi...

Jab lafz merey dard ki shiddat sey ghayal they

Meri sochien

Jab uski chaap k peechay gayeen thien to

Hawa tum ney hi mera bheegta palloo sukhaya tha

Hawa tum sun rahi thien na keh jab us ney kaha tha

Muntazir rehna mein Aoon ga

Hawa... Tum to gawah ho keh tab sey ab talak

in rastoon sey

Meri ankhoon k diye bhujnay nahi paaye

Hawa tum to usi k rastoon sey ho k aayee ho

Hawa....!

Wo aa raha tha na?

Hawa....!