Yeh maira tujh say waada hai

Yeh maira tujh say waada hai

Keh jab tak is jahan men Aik bhi zee-rooh baqi hai

Wo jab tak saans laita hai
Wo jab tak soch sakta hai
Or jab tak her khushi aur fikr ko mehsoos karta hai 
Yeh maira tujh say wa'ada hai
Keh jab tak gulistan men Aakhri jo phool khilna hai
Rahay ga shaakh per jab tak Mehak phaila-aye ga apni

Zameen say aasmanon tak Falak k aakhri taaray ko Jab tak jagmagana hai

Keh jab tak lehlahatay khaiton ko zindagi k kaam aana hai
Keh jab tak haath is qabil hain Keh uthaayen duaa'on ko
Keh jab tak aakhri baadal ko Dharti per barasna hai
Keh jab tak is zameen per zehar ka taryaaq mumkin hai

Yeh mayra tujh say wada hai
Keh jab tak jism hai Or jism men yeh jaa'n baqi hai
Keh jab tak is zameen per Aik bhi insaan baqi hai

Hazaron meel lambay faaslay bhi beech men aayen To

Mayri justujo in say kabhi bay'dam nahin ho gi
Mohabbat kum nahin ho gi...