Miley gi meri bhi koi nishani cheezon men

Miley gi meri bhi koi nishani cheezon men
Parri hui hoon kahin mein purani cheezon men

 

Merey wajood sey qaayam hain baam o dar merey
Simatt rahi hai meri laa’makani cheezon men

Lapak raha hai meri simt nuqraee baazaar
Machal rahi hai meri shaadmaani cheezon men

Yeh khush’numai lahoo k ewaz khareedi hai
Ghula hua hai nigahon ka paani cheezon men

Bahisht sey hi mein aayee zameen par lekin
Shumaar mera nahin aasmaani cheezon men

Yeh jaantey huey koi wafa’shanaas nahin
Basar hui hai meri zindgaani cheezon men

Wo aur hoti hain jo toot’ti nahin shayad
Likha gaya hai mujhey aani jaani cheezon men

Phir aaya bhoola hua khwaab, raat naina men 

Likhi hui thi purani kahani cheezon men