Shokhi Nay Teri Kaam Kiya Ek Nigaah Men

Shokhi Nay Teri Kaam Kiya Ek Nigaah Men
Sufi Hay Butkaday Men Sanam Khaankaah Men

Aankhain Bichaayen Ham To Adduw Ki Bhi Raah Men
Par Kaya Karain Keh Tu Hay Hamari Nigah Men

Barhta Houn Aagay Pooch Kar Us Say Muqaam-e-Ishq
Jo Fitna Mujh Ghareeb Ko Milta Hay Raah Men

Dil Main Sama Gayi Hain Qayamat Ki Shokhiyan
Do Chaar Din Raha Tha Kisi Ki Nigah Men

Raatain Museebton Ki Jo Guzrin Thien Aaj Tak
Maatam Men Aayee Hain Merey Roz-e-Siyah men

Us Tobah Par Hay Naaz Tujhay Zahid Is Qadar
Jo Toot Kar Shareek Ho Merey Gunaah Men

Aati Hay Baat Baat Mujhay Yaad Bar Bar
Kehta Houn Doarr Doarr K Qaasid Say Raah Men

Taaseer Bach K Sang-e-Hawadis Say Aayee Kaaya
Meri Dua Bhi Thokrain Khati Ha Raah Men

Kaisa Nizara Kis Ka Ishara Kahan Ki Baat
Sab Kuch Hay Aur Kuch Nahin Neechi Nigah Men

Jo Keena Aaj Hay Terey Dil Men Sitam Sha’aar
Jaaye Ga Kal Yahi To Dil Daad Khwaah Men

Mushtaq Is Sada K Bohat Dard Mand Thay
Ay Daagh Tum To Baith Gaye Aik Aah Men